3 сентябрьыште Марий Эл Кугыжаныш Погынышто Депутатын кечыже да комитет-влакын заседанийышт эртеныт.
Парламентарий-шамыч луымшо сесийыште ончаш темлыме кум законопроектым лончыленыт. Марий Эл правительстве председательын алмаштышыже Алексей Торощинын палдарымыж почеш, нуно 2025 ийысе да 2026-2027 ийласе бюджет дене кылдалтыныт. Тений республик бюджетын доходшым 3 667,9 миллион теҥгелан кугемдаш темлыме, роскотым – 6 579,2 миллион теҥгелан, тыгодым 2 911, 3 теҥге дефицит лиеш. Шушаш кок ийысе бюджетынат доход ден роскот ужашыже-влак кугемыт: 2026 ийыште – 11,9 миллион теҥгелан, 2027 ийыште – 10,5 миллион теҥгелан.
2025 ийыште публичный манме обязательствым шукташ – СВО-м эртараш полшаш, АПК ден туризмым вияҥдаш, тазалык аралтыш объект-влакым чоҥаш, ЖКХ системым модернизироватлаш, инвестпроект-шамычым илышыш пурташ – средствам 5 миллиард утла теҥгелан кугемдыме. Марий Элым вуйлатышын резерв фондшо ден республикысе корно фондат пойдаралтыт.
Муниципал образований-влаклан финанс полыш шотышто показатель-шамычымат тӧрлатыме. Мут толмашеш, тений верысе калыкын тӱҥалтышыжлан полшымо программын кышкарыштыже темлыме чыла проектлан окса тичмашнек ойыралтеш.
Депутат-влак школ ден йочасад-шамычым капитально олмыктымо пашам пырля финансироватлыме кышкарыште средствам ситышын ойыраш кӱлмӧ йодышым нӧлталыныт. Тиде темым республикын бюджетшым шушаш кум ийлан ыштыме годым радамынрак лончылат.
«Марий Эл Республикыште административный правам пудыртымо нерген» законыш регионысо оперативный штабын пунчалжым шуктыдымо але пудыртымо шотышто у видым пурташ темлыме.
Кӧргӧ политике министрын алмаштышыже Сергей Вохминцев Волжский, У Торъял да Шернур район-влакым муниципал округлашке савырымым пеҥгыдемдыше законыш пуртымо вашталтышым умылтарен: нине илемлаште «ик вуйым» шогалташ темлыме – муниципал образованийым вуйлатыше верысе администрацийым вуйлаташ тӱҥалеш.
Депутатын кечыжым мучашлыме деч ончыч вуйын шогышо комитет-влак пуртымо законопроект-шамычлан акым пуэныт. Парламентарий-шамыч нулевой лудмашыште чыла законодательный тӱҥалтышым сайлан шотленыт.
Тиде кечынак Законодательстве шотышто комитетын заседанийыштыже Марий Элын Адвокат палатыж пеленысе квалификационный комиссийын составышкыже Кугыжаныш Погын деч представительлан кандидатым темлыме процедурым тӱҥалаш пунчалым луктыныт.
Маргарита ИВАНОВА
Марий Эл Кугыжаныш Погынын пресс-службыжын фотожо.
