КУЧЕМЫШТЕ УВЕР ЙОГЫН

Школ – мемнан ончыкылык

Шинчымаш кечын Марий Элым вуйлатыше Александр Евстифеев Волжск оласе 6-шо №-ан школын торжественный линейкыштыже лийын.

Ушештарена, тиде тунемме вер аварийныйлан шотлалтын, но регионым вуйлатышын кӱштымашыже почеш тудым шотыш кондымо да тений 1 сентябрьыште образовательный организаций жапыштыже шке омсажым уэш почын. Олмыктымо пашалан республикын правительствын резерв фондшо гыч 5,5 миллион теҥгем ойырымо.

Торжественный линейке тӱҥалме деч ончыч Александр Евстифеев тунемме верым ончен лектын, тудым тыгак школын чодыра озанлыкше, тунемше-влакын сеҥымашышт дене палдареныт.

«Мемнан выпускник-влак кокла гыч шукынжо Волгатехыш тунемаш пурат, чодыранам аралымаште да тудым ончен куштымаште тыршат. Ме кугу тӱткышым чодыра пожар дене кылдалтше йодышлан ойырена, чӱчкыдын полигоныш лектын коштына да тушто пожарым йӧрташ тунемына. Тыгак йоча-влак дене пырля проектлам ямдылена, конкурслаш ушнена – Российыште ик гана веле огыл икымше лийынна», – кугешнен каласышт школын пашаеҥже-влак.

Марий Элым вуйлатышын палемдымыж почеш, лишыл жапыште чодырам ончен куштымо шотышто программым ямдылыме паша тӱҥалеш. Тунемше да туныктышо-влакым Шинчымаш кече дене саламлымыж деч вара тудо пытартыш жапыште образований сферыште лийшаш сай вашталтыш-шамыч нерген ойлен.

«Марий Элын правительствыже образовательный инфраструктурым вияҥдыме дене кылдалтше задачым умбакыже решатлаш тӱҥалеш. Кызыт тунемме верланда 825 веран у корпусым чоҥымо шотышто йодыш каҥашалтеш. Школ – пырдыж да оборудований гына огыл, тиде эн ончычак – еҥ-влак. Тендан коллектив Волжск олан да Марий Элын образований системыштыже ончыл верым айла», – каласен тудо.

Вашлиймаш годым Александр Евстифеев увертарен: республикын правительствыжын решенийже почеш, тений 1 сентябрь гыч бюджет сферын чыла пашаеҥжылан пашадарым 5 процентлан кӱзыктымӧ нерген решенийым приниматлыме.

«Россий Федераций президент Владимир Владимирович Путин элнан педагогшо-влак дене вашлиймаш годым палемден: «Тендан кидда, тендан талантда дене ончыкылык ышталтеш». Пагалыме тунемше, туныктышо, ача-ава-влак! Республикын правительствыжын лӱмжӧ дене тыланда тунеммаште сеҥымашым тыланем!» – каласен регионым вуйлатыше.

Тудо палемден: школышто тунемше-влаклан сай пример кӱлеш. Тиде – кундемыштына шочын кушшо, тыштак тунемше да сайын пашам ыштыше еҥ-влак.

«Таче, 1 сентябрьыште, Марий Элын ик эн пагалыме еҥже шочмо кечыжым палемда. Тиде – Борис Иванович Ефремов, Марий машиностроительный заводын генеральный директоржо. Тудо – ончыкылык тукымлан кугу пример. Тудлан – 78 ий, туге гынат тачат келге шинчымашым йодшо кугу предприятийым вуйлата. Тудо Волжскысо 6-шо номеран школын выпускникше-влакым пашаш вуча», – каласен Александр Евстифеев.

Мучашлан регионым вуйлатыше школлан кӱлеш арверым налаш сертификатым кучыктен.

 Марий Эл Республикым вуйлатышын организаций да аналитике виктемжын уверже негызеш Г.КОЖЕВНИКОВА ямдылен.

 

 

 

Опубликовать в Одноклассники

Добавить комментарий