Октябрь мучаште Марий Элым вуйлатыше Александр Евстифеев регионышто илыше да пашам ыштыше икмыняр строительлан, медиклан да социальный пашаеҥлан почётан лӱмым пуымо нерген указыш кидпалыжым пыштен.
«Марий Эл Республикын заслуженный врачше» чап лӱмым регионын 1-ше №-ан медико-санитарный частьшын 2-шо №-ан терапевтический отделенийжым вуйлатыше, врач-гастроэнтеролог Светлана Баженовалан, Медведево районысо рӱдӧ больницын тӱҥ врачшым поликлинике паша шотышто алмаштыше Елена Бастраковалан, Суд-медицине экспертизе бюрон начальникше, врач-судмедэкспертше Александр Невмятулинлан, Йошкар-Оласе 2-шо №-ан поликлиникын Семёновка врач амбулаторийжын участковый врач-педиатрже Рита Тойшевалан да Звенигово районысо рӱдӧ больницын Мочалище врач амбулаторийжын участковый врач-терапевтше Татьяна Цибаревалан пуымо.
Республик кӱкшытан чап лӱм дене палемдыме еҥ-влак коклаште марий калыкын шочшыжо-шамычым ужаш поснак куанле. Мутлан, Рита Геннадьевна (снимкыште) Семёновка да Йошкар-Ола кумдыкышто веле огыл, пошкудо регионлаштат кугу опытан врач-педиатр, чолга мер пашаеҥ, тале спортсмен семын палыме. Врач-педиатрым почётан лӱмым налмыж дене шокшын саламлена да ончыкыжымат у деч у, кугу деч кугу сеҥымашке шуаш тыланена.
М.ИВАНОВА
