Тӱнямбал экономике форум
Кугу паша вуча
Марий Эл вуйлатыше Юрий Зайцев XXVIII Петербург тӱнямбал экономике форумышто республикнан делегацийжым вуйлата.
Паша программе пеш кугу – ятыр соглашенийым ышташ палемдалтеш. Нуно цифран технологийым шыҥдарыме, экономикым, промышленностьым да спортым вияҥдыме, инвестицийым савырыме, сату да экономике, науко да технике, тӱвыра кылым кумдаҥдыме, электроэнергетике комплексым уэмдыме шотышто пашам пырля ыштымашке виктаралтыныт.
Форум Йӱдвел рӱдолаште кум кече эрта. Элнан тӱҥ экономике событий площадкыштыже Марий Эл вуйлатыше федерал кучем орган, кугу предприятий ден коммерческий организаций-влакын вуйлатышышт дене вашлиеш. Юрий Зайцев чоҥымо паша, илыме вер ден коммунал озанлык, цифран технологий, спорт да тӱвыра дене кылдалтше темылам каҥашымашке ушна.
Петербург тӱнямбал экономике форумышто эртыше переговор ден пеҥгыдемдыме соглашений-влак федерал кучем орган да бизнес-сообществе дене пашам пайдалын ышташ полшат. Нунын саскашт инвестиций да инноваций могырым кушкаш, Российын экономике картыштыже Марий Элын вержым пеҥгыдемдаш йӧным ышта.
Марий Эл вуйлатышын пресс-службыжын уверже негызеш Юрий Исаков ямдылен.
Снимкыште: тӱнямбал экономике форум эртыме вер.
