Иктешлыше кугыжаныш экзамен-влак шеҥгелан кодыныт. Шукырак баллым погышо корныжым престижный манме вузыш такырта гын, весе документшым ссузыш пуа. Тидыже, мутат уке, выпускникын шинчымаш кӱкшытшӧ дене кылдалтын. Кӧ школышто тыршен тунемын да экзаменлан сайын ямдылалтын гын, чапле лектыш дене моктанен кертеш. Теве шукерте огыл Москвасе 179-ше №-ан школ гыч Руслан Салимгареев ЕГЭ дене 400 баллым поген. Тыгайже пытартыш гана 2013 ийыште лийын. Тудо руш йылме, профильный математике, химий да биологий дене экзаменым сайын кучен.
Тыгак Руслан физике ден информатике денат экзаменым кучен. Икымшыштыже 98 баллым налын гын, весыштыже – 83 балл. Рвезе шанче пашам йӧрата, сандене документшым МГУ-н биоинженерий ден биоинформатике факультетышкыже да Москвасе физике да технике институтышко пуа.
Ушештарена, иктешлыше кугыжаныш экзамен 28 май гыч 2 июль марте шуйнен. Тушко чылаже 730 тӱжем еҥ ушнен. Рособрнадзорым вуйлатыше С.Кравцовын палемдымыж почеш, тений ЕГЭ дене кӱкшӧ баллым налше еҥ-влакын чотышт ӱмашсе дене таҥастарымаште кушкын, а эн изи баллым погышын мӧҥгешла иземын. 2017 ийыште нунын чотышт 0,57 процентыш шуын гын, тений – 0,42 процент.
Марий Элыштат ЕГЭ-м удан огыл кучат, но кумылым волтышо сӱретат уло. Тиде кечылаште республикыш обществознаний, биологий да литератур дене результат-влак толыныт. Кундемыштына обществознаний дене экзаменым 1469 еҥ кучен. 200 утла ӱдыр ден рвезе эн изи баллымат (42 балл) поген кертын огытыл. Тидыже ӱмашсе дене таҥастарымаште 3 процентлан шукырак.
Биологий дене экзаменым 671 выпускник кучен. 81 да кӱкшырак баллым куд процент утларак тунемше поген. Эн изи баллын (36 балл) лондемжым 18 процент еҥ вончен огыл.
Литератур дене иктешлыше кугыжаныш экзаменым 117 ӱдыр-рвезе ойырен налын. Тений ты предмет дене кокла балл ӱмашсе деч ятырлан шагал. 11 еҥ тудым удан кучен, ӱмаште тыгайже икте веле лийын.
Иктешлен каласаш гын, тений нине кум предмет дене ик еҥат 100 баллым поген огыл, а теве ӱмаште литературым кандашын, обществознанийым кок тунемше эн сайын кучен.
Л.ШАБДАРОВА.
