Пайрем дене
Кугурак тукымлан – тӱткышым
«Мариэнергон» специалистше-влак шке ветераныштым Илалше-влакын тӱнямбал кечышт дене саламленыт.
Филиалын профсоюз организацийже, ветеран ден самырык-влакын советышт кеч-могай пайрем годымат кугурак тукымлан тӱткышым ойырат. Теният ветеран кечын предприятийыште ончыч ыштыше 400 утла еҥ пайрем дене саламлымашым налын.
Муниципальный образованийласе РЭС-влакын пашаеҥышт ончычсо коллегышт дене кылым кучен шогат, увер дене палдарат, кӱлешан йодышым решатлаш полшат. Ветеран-влак деке мият, паша верышкат ӱжыт.
«Рӱдӧ да Юл кундем Россеть» ПАО-н «Мариэнерго» филиалжын директоржо Сергей Хлусов ветеран-влаклан пеҥгыде тазалыкым, улан илышым да куатым (энергийым) тыланен. «Марий Элысе электросеть комплексым вияҥдымашке кугу надырым пыштыше ветеранна-влакын профессионал семын ыштымышт – компанийнан пашаеҥже-влаклан сай пример», – каласен тудо.
Юрий ИСАКОВ.
Снимкылаште: ветеран-влакым саламлыме.
Фотом «Мариэнергон» пресс-службыж деч налме.
