Ӱмаште сад-пакчазе-влак кугымӧр лектыш дене пешыже моктанен ышт керт – ик велым, кушкыл пеледыш шошым пӧртыл толшо йӱштӧ дене кылмыш, вес велым, кеҥежым мыняр чумыргышо саскажат ояр да кукшо игечыште кошкыш. Юмылан тау, тений кугымӧр ситышын шочын!
Шошым тӱрлӧ росота ден нӧшмым йыраҥыш шындыме годым шканат, родо-тукымланат, пошкудыланат, ворланат ситыже манына гынат, кугымӧр гай лектышым корак, чаҥа але шогертен гай кайыклан йӧршынат пукшымо огеш шу… Но нуныжо мемнан кумылым пычырикат шотыш огыт нал: чевергаш тӱҥалше саскам ужыт гын, тунамак чӱҥгалын кӱрлын налын наҥгаят. Тиде ситыдымашым кораҥдаш огыл гын, лектыш деч поснат кодаш лиеш.
Тыгай тамле саска шканнат кӱлеш манын, Провой кундем Кожласолаште илыше Козловмыт еш кугымӧрым ончычшо тояш кумыктен керме калай ате полшымо дене араленыт. Но вор-влак мардеж пуалме дене йоҥгалтше кыльды-гыльды-гыльды йӱклан пеш вашке тунем шуыныт, саскам «оркестрын» шоктымыж жапыштак солалтен наҥгаеныт. Тунам суртоза интернетыште темлыме ик йӧн дене пайдаланаш шонен пыштен да кугымӧр йыраҥ воктеке теве тыгай шучко пакча оролым (снимкыште) шогалтен.
Тудын воктене мыят изишак шогылтым. Игече ояр, мардеж коклан гына пуал-пуал колта. Чевер тӱсан тутло саскам погымем годым ӱмбакем ала-кӧн тӱ-ӱ-ӱткын ончымыжым шижым. Вийнен шогалын, йырым-йыр ончальым – нигӧм шым уж. Адакат лап лийым да кӱрлын налме кугымӧрым иктыжым йоҥгытыш, весыжым умшашке кӱрлын пышташ тӱҥальым. Воктенемак шыве-шово, шыр-гор шоктыш. Кушто, кӧ шеҥеш манын, вуем нӧлтальым – адакат нигӧ уке. Чонемланат каньысырын чучын колтыш. Тыге икмыняр гана лие. Мардежын виянрак пуал колтымыж годым веле умылышым – пакча орол лӱдыктылеш улмаш. Пӧртыш пурышым да оза-влаклан мом шижмем каласкалышым. «Палена, шке пашажым кыртменак шукта. Эртыше ийла дене таҥастараш гын, тений мӧрым палынак шуко погышна», – нунат тыгай шучко пакча оролыштым йӧратен ончалын мокталтышт.
М.ИВАНОВА
Авторын фотожо
