Юрий Зайцев: «Ме чылан ик команде улына, еҥ-влакын сай илышышт верч пашам ыштена»
Марий Эл вуйлатыше Юрий Зайцев Ленин проспектыште 12-шо да 14-ше пӧрт-влакын кудывечыштышт олмыктымо паша кузе кайымым терген. Тыште илыше-влакын йодмашышт почеш, оласе мер тергымашын еҥже-влак дене вашлийын каҥашымек, шуко пачеран пӧрт деке да подъездлашке кудал пурымо корныш асфальтым шарыме, тротуарым ыштыме.
Юрий Зайцев палемден: пашам сайын шуктымо, чылажат еҥ-влакын илышыштым саемдымашке виктаралтын.
Умбакыже республик вуйлатыше 14-ше №-ан гимназийыште верланыше «Пилотдымо авиаций системе» рӱдерыште лийын. Рӱдер тыгаяк лӱман национальный проект дене келшышын почылтын. У тунемме ий гыч школьник-влак беспилотникым виктараш, БПЛА-м погаш, 3D моделированийлан тунемыт. Занятийышке 150 тунемше ушна. Проектым илышыш шыҥдараш федеральный бюджет гыч 12,7 миллион теҥге ойыралтын.
Мер тергымашын еҥже Григорий Кузнецов ончен коштмо годымак республик вуйлатышылан Ленин проспектысе 50, 52а, 52р номеран пӧртлаште илыше-влакын йодмашыштым луктын каласен. Тыште шинчымашым пуышо учреждений-влак улыт, а кудывечысе корным шукертак ачалыме огыл. Йошкар-Ола администрацийлан ты кумдыкым олмыкташ да тӱзаташ кӱштымашым пуэн.
«Лӱдыкшыдымӧ сай качестван корно» нацпроект дене келшышын, Йошкар-Олаште тений кеҥежым икмыняр уремысе да кудывечысе объектым олмыктымо. 2024 ийыште ты пашалан 150 миллион теҥге ойыралтын.
Республик вуйлатышын пунчалже почеш, Сад да Шумелёв уремлаште корным тӧрлымаш тенийысе ешартыш объект семын пурталтын, тыште пашам ик ийлан ончылтен шуктымо.
Юрий Зайцев Сад уремын Машиностроитель урем деч тӱҥалын Шумелёв урем марте участкыште олмыктымо пашам терген. Подрядчик автомашина кудал пурымо корным лопкаҥден асфальтым шарен, парковкым келыштарен. Йӱр годым да шошым погынышо вӱд йоген кайыме йӧндымылыкымат кораҥдыме. Тысе паша республикын бюджетше полшымо дене ышталтеш.
Корным олмыктымо да кудывечылам шотыш кондымо паша умбакыжат шуйна. Кок ий жапыште ты программе почеш 50 утла кумдыкым тӱзатыме.
Регион вуйлатыше подрядный организацийлан да мер тергыше тӱшкан еҥже-влаклан тауштен.
«Ме ужына, еҥ-влакын илышыштым саемдышаш верч подрядчик кугу пашам шукта, олаште илыше-влакат тудлан ӱшанат. Ме чыланат ик команде улына», – каласен республик вуйлатыше.
Марий Эл Республикым вуйлатышын администарцийын пресс-службыжын уверже негызеш Л.СЕМЕНОВА ямдылен
Д.РЕЧКИНЫН фотожо
