У Перинатальный рӱдерыште икымше азан шортмо йӱкшым декабрьыштак колына, Марий Элым вуйлатыше Александр Евстифеевлан ӱшандарен регионын тазалыкым аралыме министрже Марина Панькова.
Рӱдерыште чоҥымо пашам мучашлыме. 1 ноябрь марте кӧргыжымат олмыктен пытарат.
Зданийын икымше пачашыштыже кӱкшӧ технологиян оборудований шке «шагатшым» вуча. Тудым ик тылзе гыч верышкыже шындат. Объектым чоҥымо пашалан чылаже 1,5 млрд. утла теҥгем кучылташ палемдыме.
Тӱҥ врач Ирина Виноградован палемдымыж гыч, медицине персонал мегаполислаште кумдан чапланыше тӧнеж-влак дене таҥастараш лийме тиде акушерстве да неонатологий рӱдерышке пашам ышташ куснымым чытен-чытыде вуча.
А.Евстифеев азам ыштыме зал ден «яндар» кумдык-влакым ончен савырнен. Стерильный зонылаште специальный пырдыж панель ден эрыктыме системым шындымылан кӧра помещенийым вес пациентлан 20 минутышто ямдылаш йӧн уло. Тыште тыгак медперсоналлан пурен-лекташ посна омсан азам ыштыме 8 индивидуальный залым келыштараш палемдыме.
«Азам ыштыме зал-влак коклаште медсестран постшо лиеш. Ӱдырамаш-шамычым тыште азам ыштымышт деч вара кок шагат кучат да вич пачашан зданийыш кусарат. Тидыже нунын варналтмышт да эмлымвер кӧргыштӧ инфекций погынымо деч ышталтеш», – умылтарен И.Виноградова.
Республикым вуйлатыше у оборудованийым шындыме годым поснак тӱткӧ да ответственный лияш, тыгак тудын дене пашам ыштыше-влакым туныкташ кӱлмым палемден. У зданийым почмо деч вара тошто корпусын пӱрымашыжым рашемдаш тӱҥалме нергенат ойлен.
Перинатальный рӱдерын тӱҥ врачше ончыкылык ача-ава-шамычлан, кушкын толшо тукымлан тыгай кӱлешан объектым чоҥымылан, медицине пашаеҥ-влаклан профессионально кушкаш сай йӧным ыштымылан тауштен. Мутшо почеш, кызыт медперсоналым у оборудований дене пашам ышташ туныктат.
«Таушташ эше ондак. Айста чыла ыштен пытарена. Вес гана тасмам пӱчкаш толына да зданийым пашаш колтена. Тиде йӧн декабрь кыдалне лиеш манын ӱшанем. Ме чыланат иктым вучена: республикыштына аза колымо чот кугу ыле, тиде ситыдымашым кораҥдаш кӱлеш. У корпусыш эркын дене пурымым сай велым палемдыман. Но мыланна ик верыште тошкышташ жап уке, сандене вигак тичмаш куат дене пашам ышташ тӱҥалына», – манын А.Евстифеев.
Марий Эл Республикым вуйлатышын организаций да аналитике виктемжын уверже негызеш М.ИВАНОВА ямдылен
