Морко район Кӱчыкэҥер ял гыч Эмма Семёнован кидпашалан шӱман улмыжым шукын палат.
Эмма Анатольевна школыш коштмо годымак кӱнчылам шӱдыраш, носким, пижергым пидаш, ыресла тӱрлаш тӱҥалын. Тӱрлымӧ солык мучашеш кружеважым пидын. Тыгай пашалан Люда шӱжаржат кумылан лийын.
– Кидпашам ышташ мый чот йӧратем, санденак школ деч вара Йошкар-Олаште ургызылан тунемын лектынам да Морко быт пӧртыштӧ пашам ыштенам, – шарналта поро кумылан ӱдырамаш.
Икмыняр жап верысе тӱвыра пӧртыштӧ кружокым вӱден, тушто йоча ден кугурак-влакым пидаш, тӱрлӧ арвер гыч поделкым ышташ туныктен. «Муро сем» ансамбльын ӱдырамашыже-влаклан ончылсакышым пидын.
Эмма Анатольевна моткоч шуко вургемым: жилетым, джемперым, кофтым, калпакым, беретым, шовычым, тыгак салфеткым, диваныш да кӱварыш шартышым, мочалкым – пидын. Кажне арвержым тӱрлӧ узор да тӱрлӧ тӱсан шӱртӧ дене келыштара. Кызытат тудо, сурт сомыл деч ярсымеке, кидпашалан кумылын пижеш. Эн кугу пашажлан Россий калык усталыкын сулло коллективше, «Марий памаш» фольклор да этнографий ансамбльын куштызо-ӱдырамашыже-влаклан 13 ончылсакышым крючок дене пидмыжым шотлыман.
– Пидын, урген моштымо мастарлык эртыше курымын 90-ше ийлаштыже илен лекташ чотак полшен. Тунам вакшышыш шартышым, икшыве-шамычлан чийышаш чыла гаяк вургемым, эсогыл куртко йотке шке ургенам, – ойла кидмастар. – Кызытат кӱлеш годым але еҥ йодмо почеш ургем, вургемым тӧрлем: кӱчыкемдем да монь. Тыгай паша тунемме идалык тӱҥалтыште поснак ситышын ыле.
Озавате пеледышым ончен кушташ йӧрата. Кудывечыжым моткоч шуко тӱрлӧ пеледыш сӧрастарен. Озаватылан петуний, ночко Йыван, астра, космея, бархатцы, декоративный ковышта, хризантеме чот келшат. Пырдыжеш пижыктыме атыште чевергыше снеге шукыштын шӱвылвӱдым луктеш.
Чодыраште емыж-саскам, поҥгым погаш келша.
Эмма Анатольевна ден Юрий Вениаминович пелашыже 42 ий икте-весым йӧратен да пагален, ваш умылен да полшен ӱмырыштым шуят, ӱдыр ден эргым ончен куштеныт. Людмила ден Владислав ешышт дене Йошкар-Олаште илат. Кажне гаяк канышлан коча ден кова икшывышт дене пырля ныл уныкаштым куанен вучат.
– Яра жапым пайдалын эртарыме годым чон йодмо сомылым шукташ – кугу пиал. А пиалан еҥ йыр улшо моторлыкым кок пачаш сайын ужын мошта, маныт. Пиалан лийза, йолташ-влак! – ойла кидмастар.
Алевтина БАЙКОВА
Людмила Иванован фотожо
