Вероника ИВАНОВА – Волжский район Корамас кундемын ӱдыржӧ. Тудо моткоч чолга. Юл кундемысе кугыжаныш технологический университетыште увер лӱдыкшыдымылык ден увер технологий специальность дене тунемеш. Тений визымше курсым тунем пытарен.
— Вероника, молан тый технике дене кылдалтше профессийым ойырен налынат?
— Эше школыштак тунеммем годым шке ончылнем цельым шынденам. Тушко шуаш манын, ятыр вийым пыштенам. Ӱскырт койышемат уло: мом шонен пыштенам гын, садак ыштем. Адакше кызытсе илышыште технике деч посна торашке от кай. Ты профессий дене паша верымат муаш куштылго.
— Тений марий самырык тукым слётыш миенат. Тылат тудо мом пуэн?
— Слётышто кокымшо гана улам. Икымше гана 2014 ийыште Параньга район Олорышто лийынам ыле. Эн ончыч тудо тӱрлӧ кундемыште илыше марий самырык тукымым ушаш, лишемдаш полша. Тыгак тушто проектым возаш, шочмо йылмым утларак йӧраташ кумылаҥдат. Мыйын шонымаште, марий шке йылмыж денак мутланыша , вет шочмо йылмым палет гын, йот йылмымат тунемаш куштылгырак.
— Эше могай мер пашаште чолгалыкым ончыктет?
— Республикысе самырык-влакын правительствыштышт 2013 ий гыч калык-влак кокласе кыл шотышто министерствыште пашам ыштем. Тушто улмем дене ятыр лӱмлӧ марий еҥ дене палыме лийынам. Марий самырык тукым коклаштат шуко йолташым муынам. «Юлтехысе» «Мост» келшымаш клубынат чолга еҥже улам. Вузын студушемыштыжат ятыр ий чолгалыкым ончыктенам. 2013 ийыште Казаньыште Универсиадыште волонтёр лийынам. Православный доброволец-влак радамыш ушненам. Йочапӧртлаште икшыве-шамычлан тӱрлӧ мероприятийым эртаренам.
— Спорт дене пеҥгыде кылым кучымет шижалтеш. Спортын могай видшылан шӱман улат?
— Эн ончыч куштылго атлетике дене капкылем шуаренам, тыгак кушташат коштынам. Школышто тунеммем годым «Нацийын кроссшо» таҥасымаште куржталынам, Йошкар-Ола-Шап пелемарафонышто кумшо верым налынам ыле, тыгак «Российын ечыгорнышкыжо» икмыняр гана ушненам. Футбол денат модынам. Кызыт дзюдолан шӱмаҥынам. Ик таҥасымаште спорт мастерыш кандидат денат кучедалаш логалын. Тунам кумшо верыш лектынам. Тиде мылам кугу сеҥымаш лийын.
— Дзюдош утларакшым рвезе-влак ушнат…
— Кӧргӧ чонем дене ала-мо ок ситым шижынам, сандене спортыш лупшалтынам. Тыгак дзюдо капкылым веле огыл, кӧргӧ вийымат пеҥгыдемда, шкемат аралаш тунемат.
— Очыни, тый шке ончыкылет могай лийшашым кызытак шонет?
— Шонымаш шуко. Мый эше МАГУ-што тунемам. Ик верыште ом шого, ончыко кушкаш, вияҥаш шонем. Чыла вере шукташ тыршем, но чылаж годымак шонымо семын ок лий. Шукын икмыняр вере тыршымемлан ӧрыт, а мый тыге каласем: «Самырык пагыт ик гана веле толеш, садлан шуаралтман, шке вийым чыла вере терген ончыман, жапым пайдалын кучылтман».
Лидия ШАБДАРОВА.
М.Скобелевын фотожо.
