ЙӰЛА

«Пеледыш» пеледме жап

Пеледыш пайрем 2002 ийыште Российын эн сай событийже-влакын 50 ТОП-ышкыжо логалын.
Ушештарен кодыман, кодшо ийын тудо 100 эн сай событий коклаште лийын. Вашке марий калыкнан ик эн йӧратыме пайремжым эртарыме пагытше шуэш. Тений марий рӱдолаштына тудым Россий кӱкшытан фестиваль семын 18 июньышто эртараш палемдыме. Поро йӱла почеш Агавайрем кумалтыш дене почылтеш. Санкт-Петербургыштат «Пеледыш» ты кечынак лийшаш.
Марий-влакын тӱшкан илыме моло кундемыштат тыгай мероприятийым эртараш шонат. Мутлан, Виче кундемыште (Пыжанью посёлко) да Татарстаныште (Агрыз район Кадрек села) – 4 июньышто, Удмуртийыште (Камбарке район Шолья села), Свердловск областьыште (Арти район Кӱркеде села) – 11 июньышто, Москваште – 25 июньышто.
Кажне кундемысе пайремже шкешотан. Мутлан, Москваште марий-влак Екатерининский паркыш погынат, пайремым эстрадын шӱдыржӧ-влак сӧрастараш тӱҥалыт. Татарстанысе мероприятийыште эсогыл марий патыр ден марий чевер ӱдырым ойыраш тӱҥалыт. Одо кундемыште гын пайрем программым Семыкым эртарыме йӱла да ты илемысе кидмастар-влакын пашашт дене палдарыше ончер дене пойдараш шонат. Марий Эл гыч нине кундемлаш делегаций-влак кайышаш улыт.
С.Носова

Опубликовать в Одноклассники

Добавить комментарий