24 апрель – Тичмаш тылзе.
26 апрель – Марий талешке кече.
28 апрель – Шертне (Воштыр) пазар
Марий кумалтышын чинче тушыжо:
Икшыве-влак верч пелештыме мут:
«Поро Ош Кугу Юмо, икшывем-влаклан (лӱмышт) тазалыкым да ушым пу, чонышт яндар, шыма, вияш лийже, кугуракым жаплен, изиракым йӧратен кушкышт, ушыштышт ача-авам, коча-коваштым, родо-шочшо-влакым кучен илышт».
Калык верч пелештыме мут:
«Поро Ош Кугу Юмо, калыкемын чонжым нӧлтӧ, вияҥде, чумыро. Пырля погынен, ушнен, икте-весылан полшен, ваш-ваш йӧратен, вычыл-вычыл илаш туныкто».
ЭрВел Семонын (Новиковын) «Сандалык – Ош Кугу Юмо» книгаж гыч налме.
Черке йӱла почеш:
28 апрель – Господь Иисус Христосын Иерусалим олаш Чапландаралт пурымыжо. Шертне пазар.
Вольык пытыме деч Иерусалимысе архиепископ святитель Модестлан тропарь:
«Юмо дечын кугу ушым налше Модест, пеш чын илен, святитель вургем дене сылнештаралтынат, Иерусалим олан пеш поро кӱтӱчыжӧ, куан кумыл дене Христос ончылно шогет да тӱня тӱр марте сылнын волгалтарет, садлан тыйым сӧрвалыше-влаклан полышкалыше да чылашт верч кумалше лий».
«Марла молитва-влак» книга гыч налме.2005 ий
Калык пале:
Апрель ночко – кеҥежым шуко поҥго шочеш.
Апрель мучаште йӱдым шӱдыр шуко – шурно сайын шочеш.
Апрельыште куэ вӱд шуко – кеҥеж ночко лиеш.
Апрельыште вараксим эше толын шуын огыл гын, шошо юуалге лиеш.
Эҥыремыш кояш тӱҥалын – шокшо игече вашке толеш.
Ужава мураш тӱҥалын – шожым шындаш лиеш.
Шонанпылын тӱрлӧ тӱсыжӧ раш коеш – игече начерештеш.
Шарнаш кодшо ой:
Моторлан шинча возеш.
Мом палымет шуэш, тудым шке кид дене ыштен ончыман.
Кӱдыртымым вучат, рашкалтыме деч лӱдыт.
Корнын кужытшым ошкылмет годым палет.
Калык шӱлыш толкыным тарвата.
Кайыше почеш каяш ок лий, колышо почеш колаш ок лий.
Кажне еҥын кидше шке велкыже кадыр.
А.Е.Китиковын «Калыкмут» книгаж гыч налме.
Фен-шуй почеш:
Еш илышда сайын тӱзланыже манын, суртышто чыла арвер мужыран лийшаш. Шкет шинчыше мотор ӱдырамашым але таза капкылан пӧръеҥым ончыктымо сӱретым пижыктылман огыл. Мужыр чашке, мужыр йӱксӧ, мужыр лудо, мужыр сорта, пеледыш аршаш лийын кертыт. Вакшыш воктене пырля еш дене войзалтме але вате-марийын фотошт лийын кертыт.
С.Носова ямдылен
Авторын фотожо
