Марий Элын Социальный вияҥмаш министерствыже шкет илыше инвалид ден шоҥгыеҥ-влакым шушаш Кугече дене саламлен.
Таче – Кугу Кугарня. Православный верам кучышо-влак Утарышын ыресыште орланымыжым шарналтат, Кугечылан ямдылалтыт, куличым пыштат, муным чиялтат…
Кулич – Кугечын тӱҥ символжо-влак кокла гыч иктыже. Но тудым мӧҥгыштӧ пышташ куштылгыжак огыл, поснак – самоизоляцийыште улшо илалше еҥ-шамычлан.
Тидымак шотыш налын, регионын Социальный вияҥмаш министерствыже киндым пыштыше организацийлашке нине граждан-влаклан куличым поро кумылын ямдылыме шотышто йодмаш дене лектын. Тидын дене иканаште 23 организаций келшен! Да социальный пашаеҥ-влак шкет шоҥгыеҥ ден инвалид-шамычлан пайремын символжым тачак намиен пуэныт. Чылаштлан огыл, лишыл кок кечыште молымат куандарат да саламлат.
Шкет шоҥгыеҥ ден инвалид-шамычлан поро кумылым ончыктымыштлан, суртышкышт пайрем шӱлышым пуртымыштлан, нимучашдыме куаным пӧлеклымыштлан Марий Элын Социальный вияҥмаш министерствыже чыла организацийлан таушта.
М.ИВАНОВА
