Марий кечышот почеш:
31 май – Семык
1 июнь – Семык изарня
2 июнь – Семык: лышташ кугарня
3 июнь – Чоткар онлан вуйым савымаш
Марий кумалтышын чинче тушыжо:
«Кинде юмо-шамыч, кормыж дене кышкымаштат перкем пуыза, комдыштат перкем пуыза, сай озымым ончен куштыза, сукыр гай кумда вожан лийже, Юл ошма гае лектышан лийже, пикш гай олыманым ыштыза, кутко муно гае шолдыра пырчым ыштыза, шукш-копшаҥге дечат перегыза, озым вож кочмо дечат! Шемер калыкым пукшышаш пиалеш шочыктыза, вольык нарашта пиалеш шочыктыза!
Кинде Суксо! Киндым сайын шочыкто, мардеж дечат переге. Шолем дечат, шукш-копшаҥге дечат, айдеме тушман дечат переге!
Поро Кугу Юмо, шке ӱмыр йӱрет дене, умыр мардежет дене шочыкто, шкенан пиал дене, шочмо пиал дене, йӱшаш-кочшаш пиал дене, ӱян-ӧран киндет дене, кумалшаш пиал дене, кинде перкет дене йывыртыкте!
«Юмылан пелештыме мут» книга гыч налме. Йошкар-Ола, 2014 ий.
Черке йӱла почеш:
31 май – Тӱнямбал шым Погынышто лийше святой ача-влакым шарнымаш.
1 июнь – Благоверный кугу князь Димитрий Донскойын кечыже.
2 июнь – Москвасе святитель Алексийын кечыже.
3 июнь – Троицкий шуматкече, тоштыеҥым уштымо кече, Юмын Аван «Владимирский» иконыжын кечыже.
4 июнь – Тройчын
Ойӧрӧ:
Ача-авалан икшывым кудалташ ок йӧрӧ – юмо шкендым кудалта.
Чолак, черле еҥым воштылаш, оҥараш ок йӧрӧ – шке тугай лийын кертат.
Куткшуэм шалаташ ок йӧрӧ – ешет шалана.
Тоштемше йолчиемым сурт гыч луктын кудалташ ок йӧрӧ, еш гыч ватылан але марийлан ойырлен каяш корным ончыкта. Тошто йолчиемым йӱлатыман але мландыш урыман.
Р.Ялаеван «Шуктет гын ойӧрым – илышет лиеш поро» книгаж гыч налме. Мишкан.2005 ий.
Китай калыкын ушан ойжо:
Кӧ шуко ойла, тудын пашаже эрежак ок ушно.
Тендан илышдам тендам сырыктарыше виктара.
Пӱртӱс нигунам огеш вашке, но чыла жапыштыже шукта.
Чыла сайже ӱлнӧ лиеш гын, иктат кӱшкӧ кӱзаш ок тырше ыле.
Мыняр шуко аныклаш тыршет, тунар шуко йомдарет.
Шонымашдам эскерыза, лач нуно кеч-могай ошкыллан тӱҥалтыш.
Шке сеҥымашдам весын моктымыжо але шылталмыж гоч акледа гын, те эре тургыжланаш тӱҥалыда.
Шуко палыше шуко ок мутлане, а шуко мутланыше ниможымат ок пале.
С.Носова ямдылен.
Снимкыште:Йошкар-Олште сылне вер шуко.
Авторын фотожо
