Тиде ийым «Марий тӱр рӱдер» мер организаций Марий сӧрастарышым арален кодымо идалык семын увертарен ыле. Тидын шотыштак 2 декабрьлан тудо «Созвучие веков» этнофорумым эртараш палемден.
Ушештарен кодыман, Ираида Степанован вуйлатыме ты организаций марий калык вургемым арален кодымо дене кылдалтше мероприятий-влакым 2017 ий гыч ворандара. Эн ончыч марий тӱр тӱнялан, вара марий калык вуйчиемлан, марий шовырлан пӧлеклалтше проект-влакым илышыш шыҥдарен. А кажне проектшым иктешлыме семын идалык мучаште кугу этнофррум-влакым эртарен.
Тений идалык мучко марий сӧрастарышым арален кодымо идалыкым иктешлыше форум 2 декабрьыште Г.Константинов лӱмеш руш драме академический театрыште лиеш. Молгунамсе семынак марий вургем, сӧрастарыш ончер, тӱрлӧ мастар-класс, калык йӱлам, костюмым ончыктымаш, вургемым ыштыше студий-влакын презентацийышт, фольклор коллектив-влакын выступленийышт, «йыргешке ӱстел» йыр муланымаш да монь эртат. Сӧрастарыш ден вургемым ужалыше мастар-влакым ӱжыт.
Форумын участникше лияш шонышо-влак ончылгоч mariornament@mail.ru электрон почтыш йодмашым пуышаш улыт. Тушто шке нерген палдарыман, выступленийын темыжымат ончыктыман.
С.Носова
Снимкыште: кодшо ийысе этнофорум годым
