Cабантуй – 2025
Михаил СКОБЕЛЕВ
Тукымлам ушышо пайрем
Кодшо шуматкечын Руэмысе ипподромышто Сабантуй пайрем гӱжлен. Ӱмашсе пайрем федеральный кӱкшытан лийын, сандене тунам шукыжо ойыртемалтшын эртен, ты гана тыматлырак лийын. Туге гынат калык ятыр погынен. Сабантуйын мийыше-влакым Марий Эл вуйлатыше Юрий Зайцев саламлен
Пайремыш миен шумо годым лачак имне спортышто сеҥыше-влакым саламлат ыле. Эн ончыч самырык спортсмен-шамычым палемденыт. Нунын коклаште Малика Саломеникова ойыртемалтын. Тудлан ипподромын кубокшым кучыктеныт.
Пайрем программе поян ыле. Мутлан, имне-влакын ожно пожарым кузе йӧртымышт дене палыме лияш, МЧС-никын вургемжым чиен ончаш, кидмастар-влакын пашаштым ужаш, тутло пловым, татар калыкын моло кочкышыжым тамлаш йӧн лийын.
– Ешыштына Сабантуйым моткоч йӧратена. Тудо тукымлам ушышо пайремлан шотлена. Ме Медведево посёлкышто 15 ий илена. Кажне ийын Сабантуйыш коштына. Ты пайрем мыланна моткоч лишыл, шукертак уждымо йолташым, палымынам вашлийына. Изина годым Сабантуй деч вара ме икте-весына деке унала коштына ыле, кызыт тыгайже шагал вашлиялтеш. Пайремыште ме тӱрлӧ конкурслаш ушнаш тыршена, концерт годым мурызо-влакын мурымышт почеш мурена. Корэшыште таҥасыше патыр-влакын кучедалмашым шӱм вургыж ончена. Мемнан шочмо Параньга район гыч родына Рудия Габдуллинат корэш дене кучедалын. Ятыр гана сеҥышыш лектын. Кызыт тудо Казаньыште ила, ындыжым кана, ты спорт деч кораҥын, – маньыч акак-шӱжарак Нурсия Гизатуллина ден Фелира Мусина.
Михаил Скобелевын фотожо.
