Пеледыш пайрем годым Йошкар-Оласе Тӱвыра да каныме рӱдӧ паркын Кеҥеж эстраде площадкыштыже Марий ӱдырамаш-влакын «Саскавий» мер организацийже «Когыльо-могыльо» конкурсым эртарыш.
Тамле кочкышым ыштен моштымо мастарлыкым 10 озавате ончыктыш. А могай марий ӱдырамаш торык, шере коман… когыльым ыштен огеш мошто? Тыгайже укеат дыр. Лач конкурсышко ушнаш гына шукынжо ала аптыранат, ала ӧрмалгат.
А теве таҥасаш кумылым ончыктышо-влак коклаште, чынжымак, ик эн чолга марий ӱдырамаш-шамыч улыт ыле. Нуно могай-гына когыльым конден огытыл: коҥгаш кӱэштмымат, вӱдеш шолтымымат, жаритлымымат… Тугай когыльымат ямдыленыт – ала «каструль», ала «салма» манман? Вет тушеч немыр гай кӧргым совла дене коштал налын, кӱмыжыш пыштен пуэн, тамлен ончаш темленыт! Адакшым кӧргыжӧ веле огыл, комжат кочкаш йӧршӧ лийын.
А южышт сийыштым кузе гына сылнын да ойыртемалтшын сӧрастарен огытыл ыле?! Поснак емыж-саскам моткочак моштен кучылтмо, сылнын вераҥдылме палдырныш. Ты шотышто Медведево район Знаменский посёлко гыч Маргарита Тойшеван тыршымыжым каласыде кодаш огешак лий. Тудо «Саскан вийже» лӱман когыльым ямдылен конден. Да тудыжо могай ыле — тидым ужаш кӱлын: ӱмбалже йошкаргын, ужаргын, нарынчын… — икманаш, тӱрлӧ тӱс дене чеверын-моторын гына волгалтын! Адакшым кочкышыж нерген Маргарита Геннадьевна шкеже гына тыглай ыш каласкале, а шке шочмо Шернур кундемже гыч толшо вате-влак ты презентацийым сылне марий муро да баян шоктымо сем дене сӧрастарышт (снимкыште).
Йошкар-Ола гыч Зинаида Александровам палемдыман. Тудат конкурслан туге ямдылалт толын – сийже ик ӱстембаке пыкше веле пурен. Изи да кугу, ош да шем ложаш гыч, тыгай да тугай кӧрган могай когыльым ыштен конден огыл?! (Снимкыште).
Икманаш, участнице-влак чыланат конкурслан лийжак манын, чот тыршенак ямдылалт толыныт ыле. Санденак кажныжын когыльыжым тыманмеш авызлен ончымо шуын.
Жюрин иктешлымашыж почеш, (тудым Марий Эл Кугыжаныш Погын председательын алмаштышыжын полышкалышыже Александр Петров вуйлатен – авт.) «Когыльо-могыльо» конкурсышто теве кӧмыт сеҥеныт:
1-ше вер – Зоя Степанова (Параньга районысо Олор тӱвыра пӧрт пелен чумырымо «Кас ӱжара» фольклор ансамбльын участницыже). Конкурслан тудо кугу гына «Палышым» ямдылен конден.
2-шо вер – Маргарита Тойшева.
3-шо вер — Наталья Ямнеева (Марий Турек район).
Ончышо-влакын симпатийышт приз дене Эльвира Бастракова (Советский район Ургаш книгагудо пеленысе «Гармония» ӱдырамаш клуб вуйлатыше), акак-шӱжарак Светлана Бочкарева (Йошкар-Ола) да Людмила Ибраева (Кужэҥер район) палемдалтыч.
Тыгай конкурсым ончаш веле огыл куанле, тӱҥжӧ — тудын кӱлешлыкше ден пайдаже моткоч кугу. Вет тыгай сынан конкурс-влак национальный кочкышнам, а тыге гын, марий йӱла ден тӱвыранам, арален кодаш полшат.
Любовь КАМАЛЕТДИНОВА.
