ЙӰЛА САМЫРЫК ТУКЫМ

Сӱан йӱла

Шергашым икте-весылан чиктымаш, ӱдырын пеледыш аршашым кудалтыме, Мендельсонын маршым колыштмаш — чыла тиде йӱла сӱан кечын шукталтеш. Кызыт тидын деч посна ик пайремжат ок эрте, очыни. А кунам нуно тӱҥалтышым налыныт?

1858 ий 25 январьыште, прусс кронпринц Фридрих ден Виктория британийысе принцессын ешым чумырымо кечын йоҥгалтме деч вара Мендельсонын семжым кумдан кучылташ тӱҥалыныт.

Акрет Римыште каче ӱдырлан шке йӧратымашыжым ончыкташ кӱртньӧ шергашым пӧлеклен. А сӱан кечын шергашым икте-весылан эн ончыч Египетыште чиктеныт.

Пеледыш аршашым кудалтыме йӱла Йӱдвел Америкыште «шочын». Ик ӱдыр шке пеледышыжым йолташыжлан пӧлеклен. Тидын деч вара тудыжо кӱчык жапыште марлан лектын.

Икымше куштымаш йӱла ожно годсек пале. Тудым ритуал семын кучылтыт.

Оръеҥын вургемже гыч ужаш пиалым конда манын шотленыт. Тувыр аралалт кодшо манын, 14 курымышто Английыште подвязкым кышкыме йӱла лектын. 

Акрет Римыште фата йошкар тӱсан лийын. Тудо самырык ватын марий пелен улмыжым ончыктен. Тошто Грецийыште нарынче тӱсан фата дене вуй гыч тӱҥалын йол пундаш марте петыралтыныт. Ош фата арулыкым ончыкта.

Бокалым пудыртымо йӱла денат шукынжо палыме улыда, шонем. Руш-влак ожно бокал олмеш шун кӧршӧкым кучылтыныт.  Английыште каче сӱан кочкышан тарелкам корныш кудалтен. Германийыште гын кӱмыж совлам родо-влак кышкеныт. Ӱдыр-каче тудым эрыктышаш улыт улмаш. Тиде икымше нелылыкым пырля сеҥен лекмым ончыктен.

О.МОШКИНА

Опубликовать в Одноклассники

Добавить комментарий