25 майыште Ленинград областьысе Всеволожск олаште Юбилейный площадьыште «Пеледыш пайрем-2024» шке йырже тӱрлӧ калыкым чумырен. Тудым Санкт-Петербургысо «Ший корно» НКА-н чолга еҥже-влак эртареныт.
Пайремым почмо годым Ленинград областьысе верысе самоуправлений, калык кокласе ден конфессий кокласе кыл шотышто комитет председательын советникше Владимир Михайленко каласен: «Пеледыш дене кылдалтше пайрем марий-калыкын веле уло. Сандене ты пайремыш уло кумылын ынде латкокымшо гана толам».
Пеледыш пайремыш уна-влак Санкт-Петербург ола, Ленинград область да Марий Эл гыч чумыргеныт. Республикнан делегацийжым Калык усталык да тӱвыра ден каныме паша шотышто шанче-методике рӱдерын методистше Максим Алгайкин вуйлатен. Тудо Марий Эл правительстве вуйлатыше Ю.Зайцевын, Марий Эл правительстве вуйлатышын алмаштышыже-тӱвыра, печать да калык-влакын пашашт шотышто министр Константин Ивановын саламлымашыштым пайремыш погынышо-влаклан лудын.
Концерт программым кӱсле сем почеш Юлия Венкиль почын. А варажым Марий Эл гыч калык коллектив лӱм дене палемдалтше «Марий памаш» фольклор да этнографий ансамбль шке мастарлыкшым ончыктен. Пайремыш погынышо калык нунын дене пырля весела сем почеш тавалтен. Сценыште шуко ий пырля илыше марий еш-влакым саламленыт, СВО-н участникше-влакын ешыштым палемденыт. Икмыняр ий «Ший корно» НКА-м вуйлатыше Евдокия Соловьёва национально-культурный автономийым тений вуйлаташ тӱҥалше Лариса Арламовалан ош солыкым вачӱмбакыже сакен. Тиде шкешотан йӱла гоч Евдокия Евдокимовна у вуйлатышылан сугыньым пуэн.
Пеледыш пайремыште тӱрлӧ мастер-класс пашам ыштен. Мутлан, Йошкар-Оласе художественный училище гыч 2-шо курсын студенткыже-влак Екатерина Смирнова ден Елизавета Золотых сӱретлаш туныктеныт. Верысе марий кидмастар-влак йоча-влаклан аралтыш курчакым ыштымым ончыктеныт. Мероприятийыште Марий книга савыктышын пашаеҥже-влак книга выставке-ярмиҥгам ямдыленыт. Уремыште изижат-кугужат тӱрлӧ калык модыш дене модыныт.
Мут толмашеш, тиде гана командировкыш мийыме годым шке ӱмбалнем артистын илышыжым шижаш логалын. Йошкар-Ола гыч Санкт-Петербург марте корно пеш тора. Автобусышто тыгай кужу корным кудалаш йӧндымӧ, тыгак кочкашат корно валне логалын. Икманаш, кажне пашан шке ойыртемже уло.
Всеволожск олаш йӱдым миен шуынна, тушто мемнам кызыт Санкт-Петербургышто илыше, «Марий памаш» ансамбльын ончычсо участницыже Татьяна Танникова вашлийын. Ме верысе техникумын тӱшкагудыштыжо малаш верланышна. Эрдене Всеволожск олам ончен лекмеке, концертыш ушнышна.
– Мутат уке, куштымо да мурымо годым чыла нойымет, уто шонымаш ӱштылалтеш. Мария Лазаревна Соловьёвалан тау, тудо мемнан сӱретчына, а ме тудын чияже улына, – «Марий памаш» ансамбльын артистше-влакын тыге каласымышт чонышкемак логале. Нине мутла деч вара артист-шамычын ойыртемалтше, но кӱлешан пашам ыштымыштым поснак умыленам. Нуно тӱрлӧ кундемышке коштыт, марий калыкнан тӱвыраж дене палдарат, Марий Элна дене палымым ыштат.
Кум кече жапыште ме Всеволожскышто, Санкт-Петербургышто лийынна. Санкт-Петербургын икмыняр сылне вержым, Ленинград областьысе Келшымаш пӧртым ончен лекна. Тушто областьыште илыше тӱрлӧ калык нерген 16 интерактив тоштерым ыштыме. Нине олала, тоштер дене лишыл «Фотолаштыкыште» тендам палдарена.
М.СКОБЕЛЕВ
Авторын фотожо
