Марий Эл Образований да науко министерствын увертарымыж почеш, тений республикыштына икымше гана парт коклаш 8021 ӱдыр-рвезе шинчын. 249 общеобразовательный организацийыште чылаже 86 тӱжем утла шинчымашым налаш тӱҥалын.
2 сентябрьыште кажныштыже икымше йыҥгыр йоҥгалтын, кажныже икымше гана парт коклаш шичше ӱдыр-рвезе-влакым вашлийын. Икымше йыҥгыр ты кечын Йошкар-Оласе 32-шо №-ан школыштат мӱндыркӧ шергылтын. У школым Россий Федерацийын сенаторжо, Федераций Советын председательжын алмаштышыже Константин Косачёв, Марий Элым вуйлатыше Юрий Зайцев да Йошкар-Олан мэржын пашажым шуктышо Антон Трудинов торжественно почыныт (снимкыште).
У школ ончылсо мотор амфитеатрыште погынышо йоча, туныктышо да ача-ава-влакым Шинчымаш кече дене эн ончычак республикнам вуйлатыше Юрий Зайцев саламлен:
– Пагалыме йоча-влак, туныктышо ден ача-ава-шамыч! Чыладам пайрем – Шинчымаш кече – дене саламлем! Мемнан йоча-влак эше ик ийлан кугурак лийыныт. Икымше классыш толшо-влак илышыштын ик эн оҥай йыжыҥышкыже – школ пагытыш – ошкылым ыштеныт. Ончылно – латик ий, ты жапыште те, йоча-влак, шуко йолташым муыда да, можыч, тиде келшымаш уло ӱмырда мучко пеленда лиеш. Поро туныктышыда-шамыч деч шукылан тунемыда, тендам чын корныш шогалаш лач нуно виктараш тӱҥалыт. Тыланем тыланда тунеммаште сеҥымашым!
Пагалыме педагог-влаклан куштылго огыл, но моткочак кӱлешан пашам шуктымыштлан – кугу тау! Тиде паша – айдемылан воспитанийым да илышыш путёвкым пуымаш. Конешне, ача-ава-шамычлан эн ончычак умылышо лияш, вет кажныже шке икшывылан сайым гына шона. Илышыште шуко нелылык вашлиялтеш, но ме чылажымат сеҥена! Ончыко гына!
1100 веран школын икымше класслаштыже – чылаже лу – 300 утла икшыве шинчымашым погаш тӱҥалеш.
Умбакыже поро тыланымашым сенатор, Федераций Советын председательжын алмаштышыже Константин Косачёв каласен. Тудо палемден:
– Таче ме 32-шо школын шочмо кечышкыже погыненна. Ты кече курымешлан тунемме верын, республикын историйышкыже пура. А икымше классыш толшо-влак курымешлан икымше тунемше семын кодыт. Сандене те, йоча-влак, тидын дене кугешнаш тӱҥалыда манын ӱшанена. Мыланем шканем тачысе кече – тыглай огыл. Шуко ий ончыч тиде школым чоҥымаш мылам, Россий Федерацийын сенаторжылан, Марий Эл Республик правительстве деч икымше поручений лийын. Сандене тынар шуко жап илышыш пуртен кертдымылан мыйымат, правительствымат вурсен кертыда. Туге гынат тиде школ таче почылтеш. Йырым-йырна шуко мо чоҥалтеш, но, мыйын шонымаште, нунын коклаште эн тӱҥ – школ, йочасад, илыме вер. Нуно чоҥалтыт гын веле ты кундемыште сай илыш лиеш. Школын шочмо кечыж дене саламлем! Корныда пиалан лийже, йоча-влак!
Йошкар-Олан мэржын пашажым жаплан шуктышо Антон Трудиновын мутшо почеш, 32-шо №-ан школ таче рӱдолан эн чапле тунемме вержылан шотлалтеш. Тудо манын:
– Тыгай пӧлекым мыланна да тыланда, йоча-влак Марий Элым вуйлатыше Юрий Зайцев ден Федераций Советын председательжын алмаштышыже Константин Косачёв ыштеныт. Айста нунылан рӱж «Тау!» манына.
Тиде ой деч вара «Восточный» микрорайон мучко «Тау!» шергылте. Почётан уна-влак школ омсаш пурымаште волгалтше йошкар тасмам пӱчкыч да, икымше йыҥгыр йоҥгалтмеке, икымше классыш толшо ӱдыр-рвезе-влак поче-поче тунемме верышкышт ошкыл пурышт.
Галина Кожевникова
М.Скобелевын фотожо
