Уремыште шыже озалана. Икымше лум шем лавырам петырен, санденак корно пеш тазыла – мланде эше кылмен шуктен огыл.
Советский районысо Кундышӱмбал ялын ик уремже дене ошкылам. Эн ончычак, паледа, мом шекланен шуктышым? Капка-шамычым. Нунынжо шукышт ожнысо семын ыштыме улыт. Адакшым икгайрак форман оралтат ятыр.
Ошкылмем годым тыште илыше Евгений Казанцев суртшо воктене горбыльым пӱчкеден да кудывечышкыже шупшыктен. Тудлан изи ӱдыр полышкален.
– Мый шке озанлык дене илем. Техникемат уло, но чыла тошто. Ужалаш жал, а налаш кызыт куштылго огыл, – каласыш пӧръеҥ.
«Юмо полшыжо» малдальымат, умбакыже ошкыльым…
Уремыште чатка сурт ятыр. Кажныжын, манмыжла, шке сынже, но шукышт йошкарге, ужарге да канде улыт. Южыжо пуражымат чиялтен. Ялыште теве могай «шонанпыл» волгалтеш!
Капка-шамычым тӱткын ончен эртымем годым иктыштыже тидымат шекланышым: имньым огыт ашне гынат, меҥгыште тудым ушештарыше оҥго аралалт кодын. Теве суртозат уремыш лекте.
– Мый Анатолий Павлович Ялпанов улам. Кугезе кочам Михаил Иванов – тудым ялыште Микал кугыза маныныт – кидмастар лийын. Шканже ныл-вич пӧртым чоҥен. Ме тиде суртым 1972 ийыште ыштенна. Эше пеҥгыде, туге гынат эре шотыш кондена, – каласыш пӧръеҥ.
Суртым кӱкшакашке вераҥдыме, санденак умбачынак волгалтеш. А ваштарешыже, изи корем гоч, кугезе Микал кугызан шындыме пӧртшӧ коеш. Нуным кӱвар ушен шога.
Мый суртозан капкажым умбакыже шымлем. Меҥгыштыже аралтыш семын кечым пӱчкедыме. Тольык, шонем, молан тудыжым нарынче чия дене чиялтеныт? Чиялтыдеат пеш сайын койшашыс… Меҥгыжым тыге шогалтыме: мландыш кӱым пыштыме, тудым лӱмын ыштыме товар дене лакемдыме да тушко пырням шогалтыме. Тыге негызлымылан кӧра тудо тачат чоткыдо. Марий калык теве кузе капкам ыштен!
М.СКОБЕЛЕВ
Авторын фотожо
