28 май – Пограничникын кечыже.
Ты войскаште службым эртымыда мо дене шарнымашеш кодын? Ты кечым йолташда-влак дене кузе пайремлышда?
Иван ГАВРИЛОВ, кидмастар, Морко район Шлань ялыште илыше:
– Службым 1998-2000 ийлаште эртенам. Эн ончычак Находка олаште учебкыште лийынна, а вара службо Амур область Благовещенск олаште эртен.
Армийыште лийме жап ӱмыр мучкылан шарнаш кодын. Мӱндыр мландыште марий рвезе дене палыме лийме поснак куандара. Александр Михайлов Пошкырт кундем Мишкан район гыч. Тудо йолташыже-влак дене корабльым ачалаш толын, пашаче койышан поро кумылан рвезе шинчаш вик пернен да палыме лийынна. Саша дене кызытат кылым кучена, еш денат келшена. Кок гана мемнан деке толын каен. Ынде мемнам унала вуча.
Унчо кундем гычат погранвойскаште службым ятырын эртеныт. Ты кечын, чылан погынен, Кугу Отечественный сарыште вуйым пыштыше, военный конфликтлаште лийше-влаклан пӧлеклалтше памятник воктеке пеледышым пыштенна. Мемнан пелен уке лийше пограничник йолташна-влакым шарналтен, шӱгарлаш миенна. Варажым пӱртӱсыштӧ каналтенна, тӱрлӧ йодышым каҥашенна.
Погранвойскаште служитлымаш илышым умылаш, калыкым пагалаш, пеҥгыдылыклан да элым йӧраташ туныктен. Тидлан мемнам чот ямдыленыт.
Дмитрий ГОЛОВИН, У Торъял район Тошто Торъял ялын шочшыжо, кызыт Йошкар-Олаште илыше:
– 2004-2006 ийлаште армийыште служитлыме ийла шуко жаплан шарнаш кодыт. Тӱрлӧ кундем гыч чумыргышо нӧргӧ рвезе-влак эн ончычак кум тылзе Анапыште учебкыште лийынна, а вара Амур область Благовещенск олаште служитленна. Теҥыз пограничник лийынам, садлан кок пайремым пайремлена.
Пограничник кечым ялыште йолташем-влак дене палемденна. Эрдене верысе школ воктене погыненна да Кугу Отечественный сарыште вуйым пыштыше-влаклан памятник воктеке пеледышым пыштенна. Варажым чодыра лишне пӱя дене чумыргенна, армий жапым порын шарналтен, кол лемым ямдыленна, шылым кӱктенна.
Евгений САДОВИН, «Марий Эл» газетын пашаеҥже, Марий Элын сулло журналистше:
– Ачам погранвойскаште, Китай чекыште служитлен. Армий илышыж нерген каласкалымыж гыч теве мом шарнен кодынам: «Тунам тудо кундемыште нужнан иленыт, садлан тушто илыше-влак, поснак ӱдырамаш-шамыч, чек гоч полышым йодаш миен коштыныт. Ме, салтак-влак, киндым, шкенан сухпаёкнам пуэн колтенна».
МарГУ-што пырля тунемме икмыняр йолташем погранвойскаште службым эртен. Мутлан, Киров кундем гыч Юрий Ошаев, тыгак Кужэҥер район Изи Лаждӱр гыч тукым изам Валентин Березин ты войскаште служитленыт. Таджикистан-Афганистан чекыште службым эртыме жап гыч курык коклаште коштмыж нерген оҥайын каласкалымыжым шарнем. Изам, ужар фуражкым, тельняшкым чиен, пограничник йолташыже-влак дене вашлияш, самырык годсо пагытыштым шарналташ манын, ӱмаште лӱмынак Йошкар-Олашке толын ыле.
Алевтина БАЙКОВА ямдылен
Иван Речкинын фотожо
