7-13 августышто Марий Элыште эстон уна-влак лийыныт. Эстонийыште илыше марий кинорежиссёр Алексей Алексеев нуным тыш толаш кумылаҥден.
Тарту университетын калык куштымаш ансамбльжын участникше-влак, чылаже 32 еҥ, тӱҥ шотышто туныктышо да тунемше-влак улыт. Корно роскотым иземдаш университетат полшен, но тӱҥ шотышто шкешт тӱленыт. Марий Элыште толмо программышт оҥай лийын. Икымше кечын нуно Йошкар-Олам ончал савырненыт. Вес кечын Оршанке районын сылне вершӧржӧ, Мастарлык пӧртын пашаеҥже-влак дене палыме лийыныт. Чарла кремльыште эртыше Марий касыштат эстонла куштымыштым ужын кертынна. Кумшо кечын нуным Унчо вел, Финн-угор тӱнян тенийысе культур рӱдыверже, вучен. Нылымше кечын коллектив Йошкар-Олан 435 ияш лӱмгечыжым палемдымашке ушнен. Унчышто семынак икмыняр площадкыште шке мастарлыкшым ончыктен. А рушарнян артист-влак Кужэҥер районысо Визым ялыште эртыше «Муро памаш» регион-влак кокласе икымше фестивальын участникше лийыныт. Каласен кодыман, тиде ансамбль Оршанке да Кужэҥер районласе «Какшан сем» да «Мурсескем» фольклор коллективла дене сай кылым куча. Тидланак кӧра лач нине кок районыш миен толаш кумылым ончыктеныт.
Ме эстон артист-влак дене Йошкар-Олан кечыштыже вашлийынна да вуйлатышыже Авели Асбер дене мутым вашталтышна. Ансамбль 1945 ийыштак ышталтын. Чылаже тушко 150 еҥ коштеш. 10 куштышо тӱшка гыч шога. Тудо куштымаш дене кылдалтше Эстонийысе чыла гаяк кугу мероприятийыш коштеш. Тӱнямбал кӱкшытан фестивальлаште ятыр элыште лийын. Шукышт Марий Элыш тений икымше гана толыныт. Но нимынярат чаманен огынал, маньыч. Келшен нунылан мемнан мотор пӱртӱс, ял илыш дене палдарымаш, марий калыкын тӱвыраже, йӱлаже. А кочкышыжо да калыкнан поро кумылжо нерген мыняр сай шомакым колаш логале!
С.НОСОВА.
Снимкыште: Тарту гыч толшо артист-влак — Марий мландыште.
М.Скобелевын фотожо.
