Тӱрлӧ амал дене, мутлан, йомдаренда але иктаж-кӧ шолыштын, луктын налын, моло йӧн дене паспортда вес еҥын кидышкыже логалын да, тудын дене пайдаланен, тендан лӱм дене кредитым налыныт. А тидлан паспортышто мошенник-шамыч фотодам вашталтен, тендан семын кидпалым шынден кертыныт. Займым онлайн налаш эшеат куштылгырак. Тунам паспортын копийже гына кӱлеш.
Тыгай годым мом ыштыман? Кузе лийман? Тидын нерген таче радамлын каласкалена.
- Эн ончычак вигак кредиторлан йодмашым возыман. Тушто палдарыман: договорым те ыштен огыдал, оксамат налын огыдал, ойпидышыште шояк кидпалым шындыме але идентификаций манмым те огыл эртенда.
Паспортдам шолыштыныт улмаш гын, полиций гыч тидын нерген налме справкын копийжым йодмаш дене пырля пуыман.
Тиде заявленийыштак внутренний манме шымлымашым (расследованийым), тергымашым эртараш йодман.
- Тиде йодмаш деч вара кредитор шымлымашым тӱҥалеш. Оксам те огыл налында манын умыла гын, улшо парымдам шӧрат.
Тендан олмеш оксам мошенник-шамыч налме доказательствым кредитор огеш му гын, парымым шӧраш тореш лийын кертыт. Тыге тунам лийын кертеш, кунам тендан лӱм дене кредитым налмеке гына паспортда йоммо нерген увертареда.
Ойпидышым те огыл ыштымым палдарыше доказательстве уке годымат кредитор парымым шӧраш тореш лийын кертеш.
- Компаний тергымашым лӱмжылан веле эртарымыла чучеш, доказательстве-влакым шотыш налын огыл гын, тыгай годым Россий банкын сайтыштыже интернет-приемныйыш вуйшиймашым возыза.
- Кеч-мо кеч-кузе эрта гынат, садак полицийыш йодмашым возыза. Молан манаш гын ик шоя кредитор дене нелылыкым рашемдеда гынат, весе-влак огыт лек манын, ӱшандарен каласаш ок лий. Сандене преступник-влакым писынрак кучаш тыршыман.
- Полицийыш кайыме деч ончыч кредитор деч теве мом пуаш йодман:
— могай документ-влак дене кредитым налыныт, нунын заверитлыме копийыштым;
— могай счетыш оксам кусарыме, тудын реквизитшым;
— договорым оформитлыше пашаеҥын данныйжым;
— кушто тиде ышталтын, тиде офисын адресшым.
Чыла тидым полицийыш возымо йодмаш пелен пыштыман. Нине увер уда пашам ыштыше-влакым писынрак муаш полшен кертыт.
- Эше теве мом ыштыман:
— жапын-жапын шке кредит историйым йодман да у кредит але займ ешаралтын огытыл, кредиторын але судын тендан лийше парымдам шӧрымӧ нерген уверым ӱштмӧ мо – тергыман.
Тендан ӱмбалне у кредит але займ улмо рашемеш, но те нуным налын огыдал гын, оспариватлыме манме процедурым уэш эртараш логалеш.
Икманаш, парымда шотышто йодышым мыняр писынрак рашемдаш тӱҥалыда, тудым суд деч посна рашемден кертыда манын ӱшанаш амал тунар кугурак лиеш!
Туткарыш логалаш огыл манын, мом ыштыман?
— Паспортым йомдареда гын, тудын йоммыж нерген заявленийым вигак возыман да тудын йоммыж нерген справкым налман;
— кугу кӱлешлык деч посна паспортым копироватлаш пуыман огыл;
— паспортдан данныйжым палыдыме еҥ-влаклан телефон дене каласыман огыл, соцкыллаште возыман огыл;
— Кугыжаныш услуго порталыш пурымо данный-влакым иктыланат ида каласе. Тушко кок факторан (пароль + смс гыч код) идентификацийым вераҥдыман;
— паспортдан данныйжым аралыме (адрес корнышто сравоч улман) сайтлаште гына возыза.
Любовь Камалетдинова.
