12 май – медшӱжар-влакын кечышт.
Тыланда медицине паша мо дене келша але огеш келше? Ты аланыш пашам ышташ каяш кӧ темлен?
Валентина ЕФРЕМОВА, Советский район Кужмарий тӱвыра пӧртын художественный вуйлатышыже, мыскараче:
– Медицине пашаеҥ лияш нигунамат шонен омыл, санденак тӱвыра аланыште пашам ыштем. Мый уколын имыж гычак моткоч лӱдам. Йолташем-влак кокла гыч медшӱжар-влак улыт. Нуно ойырен налме пашаштым сайын палат да йӧратат. Пеш кугу тау нунылан, таза лийышт!
Алексей АХТЯМОВ, спорт дене кылым кучышо (Шернур район):
– Медициныш пашам ышташ каяш нигӧ темлен огыл, шкеак ты корным ойырен налынам. Озаҥ оласе кугыжаныш медицине университетым «провизор» специальность дене тунемын лектынам. Йоча годсекак ачамын аптекыште пашам ыштымыжым ужынам да эм дене ӱпшалтше вургемже келшен. Садланак, очыни, мыят кызыт аптекыште тыршем.
Еҥ-влак дене мутланаш, нунылан могай эмым да кунам йӱмӧ шотышто, тиде але вес эмын пайдаже да моло нерген умылтараш келша. Икманаш нунылан кертмем семын полшашак тыршем.
Дина ПАВЛОВА, М.С.Степанов лӱмеш Морко тӱвыра полатын методистше:
– Изиэм годым тӱҥалтыш класслаште туныктышо лияш шоненам, но пӱрымаш корнем тӱвыра аланыш савыралын. Медицине пашаеҥ-влакын шуктымо пашаштым моткоч кӱкшын аклем, вет нуно еҥ-влакын тазалыкышт верч вуйын шогат. А тиде пашам шукташ келге шинчымаш, пеҥгыде чытыш да тунамак поро кумыл иктыш ушнышаш улыт. Шушаш пайремышт дене шокшын саламлем да нунын паша надырыштлан шӱм-чонем гыч шолын лекше таумутым каласем.
Анастасия МУРАВЬЁВА, самырык юрист:
– Изи годсек врач лияш шоненам. Авам ош халатым урген да эмлызын модышыжым налын пуэн. Чыла модышем эмлем да уколым шындылам ыле. Кушкын шумеке, шонымаш вашталтын: еҥ-влак тӱрлӧ улыт, кажныжым ончаш да кажныж деке шӱмаҥын мошташ кӱлеш, куштылго паша огыл. Айдеме дене мутланаш – тиде икте, а эмлаш тӱҥалаш – йӧршеш весе. Пеш ответственный профессий. Южгунам интернет лаштыклаште тӱрлӧ операцийым ыштыме, пӱйым эмлыме ролик-влак логалыт, нунымат ласкан ончем. Медициным кызытат эскерем. Тиде сферыште тыршыше-влакым пагалем, пашашт эреак ушнен шогыжо да пиалан, таза пациентышт шукемышт.
А.БАЙКОВА
