ОБРАЗОВАНИЙ УВЕР ЙОГЫН

«Пашам тӱҥалме гын, мучаш марте шуктыман»

Марий Элым вуйлатышын пашажым жаплан шуктышо Юрий Зайцев Килемар кундемыште лиймыж годым  эн ончычак Кугу Памъял школым чоҥымо площадкым терген. Ушештарена, тушто у тунемме тӧнеж концессий ойпидыш почеш ышталтеш. Марий Элым вуйлатышын пашажым жаплан шуктышо каласен: объект палемдыме жапыште огеш чоҥалт, концессионер шке обязательствыжым шуктен огыл.

«Просвещений» нылымше концессий компаний» ООО-м вуйлатышын производство ужаш шотышто икымше алмаштышыже Александр Чаусовскийын мутшо почеш, паша графикым жаплан келшышым ыштыме. Кызыт школын пырдыжшым нӧлтат, тӱжвалне вӱд пуч да канализаций сетьлам монтироватлат, стадионным шотыш кондат. «График уло. Идалык мучаш марте пашам мучашлышаш улына», – каласен тудо да ешарен: кызыт инженер коммуникаций шотышто йодыш решатлалтеш.

Юрий Зайцевын «Чоҥышо семын пашадам кузе акледа? Кок тылзе утла жап гыч объект ямде лиеш мо? Чоҥымо площадкыште пашаеҥ-влак шукынрак лийшаш улыт» каласымыжлан Александр Чаусовский вашештен: «Пашаеҥ-влакым ешарена, тыгак профилян организаций-шамычым ушена».

Марий Элым вуйлатышын пашажым жаплан шуктышо республикын чоҥымаш, архитектур да илыме вер-коммунал озанлык министржлан школым чоҥымо шотышто пашам тергаш кӱштен. «Социальный могырым кӱлешан объектлам чоҥымым шке контрольышто кучаш тӱҥалам. Пашам тӱҥалме гын, тудым мучаш марте шуктыман», – каласен тудо.

Кызыт ты школ – коҥгам олтыман вич пу оралте, нуно 1938-1940 ийласе улыт. А у тунемме верым чоҥымо шотышто концессий ойпидыш 2021 ий 23 сентябрьыште ышталтын.

Марий Эл Республикым вуйлатышын организаций да аналитике виктемжын уверже негызеш Г.Кожевникова ямдылен.

Д.Речкинын фотожо

Опубликовать в Одноклассники

Добавить комментарий