Тиде амал дене спецслужбо-влак теҥгече рӱдолаште Комсомольский гыч Первомайский урем-влак ужашыште Кремлёвский уремым петыреныт. «21 век» ден «Плаза» ужалыме рӱдер-влак кокласе кумдыкым авырен налыныт. Тушто «Вашкеполыш» машина ден пожарный-влак дежуритленыт.
Тыгаяк сӱрет «Yolka», «Форум», «Планета» ужалыме рӱдерлаште да еҥ-влак шуко лийме эше икмыняр вере палдырнен.
МВД-н пресс-службыжо тидын нерген кызытеш нимом каласен кертын огыл. Икымше версийже — телефон террористический акт.
Ушештарена, тӱрлӧ вере миным пыштыме нерген увертарымаш толкын кодшо арнян Российысе кугу олала мучко эртен. Эн шукыжо 13 сентябрьыште лийын.
Теҥгече тыгак Москваште икмыняр вер гыч еҥ-влакым эвакуироватленыт, палдара ТАСС.
Л.Камалетдинова.