УВЕР ЙОГЫН

Марий Элын главаже Александр Евстифеев йочасад-влакын чоҥалтмыштым терген

Кодшо изарнян Марий Эл вуйлатыше А.Евстифеев республикыште икмыняр йочасад кузе чоҥалтмым ончен коштын. 

Тӱҥалтыште А.Евстифеев Знаменский посёлкыш миен. Тушто 125 веран 2,5 тӱжем квадрат метр кумдыкан кок пачашан йочасад нӧлтымым терген. Тиде оралтыште 5 йоча группо лийшаш. Икымше пачашыште ясельный группым вераҥдаш шонат. Проект почеш, тушто кочкыш блок, медицине кабинет, музыкальный да спортзал лийыт. А йочасад воктенсе кумдыклан ныл тӱжем квадрат метрым ойырат.

Йошкар-Олаште республикым вуйлатыше «Мирный» микрорайонышто лийын. Каласыман, микрорарайоным ыштыме годым йочасадым проектыш пуртен огытыл, садлан Йошкар-Олан мэрийже Марий Элын Чоҥымо, архитектур илыме вер да коммунал озанлык министерствыж дене кутырен келшыме почеш,  Ураев бульвар 6-шо пӧртын икымше пачашыштыже йочасадым вераҥдыме нерген мутланен келшен. Тушко 200 икшыве кошташ тӱҥалеш. Чоҥышо-влакын мутышт почеш, кӧргӧ пашам апрель мучаште ыштен пытарышаш улыт, а сентябрьыште тудо шке омсажым почшаш.

Эше ик йочасадым Медведево район Руэм посёлкышто, «Сосны» микрорайонышто, чоҥат. Школ деч ончычсо учреждений илыме пӧртын икымше пачашыштыже верлана. Пӧрт «Россий ешлан – илыме вер» федеральный программе полшымо дене нӧлталтеш. Йочасадыш 70 йоча кошташ тӱҥалеш.  Республикым вуйлатыше тыгак Медведево посёлкыштӧ Полевой уремыште чоҥалтше йочасадышкат пурен лектын.

А.Евстифеев кажне чоҥымаште  лийме годым паша кузе каен шогымым да йочасадым могай жаплан чоҥен шуктымым йодын, тыгак ыштыме пашан могай кӱкшытыштӧ улмыжым терген.

— Подрядчик-шамыч дене пашам кунам мучашлыме, йочасад воктенсе кумдыкым тӱзатыме шотышто мутланенна. Йочасадым чоҥымаш республикыште моткоч кӱлешан йодыш. Кызытсе тергымаш ончыктен: чоҥымо паша график почеш кая. Икмыняр йочасад сентябрьыште омсажым почшаш, а молышт  идалык мучаш марте почылтшаш улыт. Проект-влак тачысе илышлан келшен толшо улыт, лӱдыкшыдымылык шотыштат тыгак. Пӧлем-влак волгыдо, кугу улыт. Йоча-влак «шокшо» кӱварыште куржталаш тӱналыт. Тыгак кухньо, спортзал улыт. Икманаш, икшыве таза, виян кушшо манын, чылажат лиеш, — палемден А.Евстифеев.

А 30 мартыште регионым вуйлатыше, йочасадым чоҥымо ныл площадкым ончен савырнымеке, совещанийым эртарен. Тушто А.Евстифеев умбакыжым ыштышаш паша дене палдарен. Йошкар-Олан мэрже Е.Маслов ден Медведево район администрацийым вуйлатыше Д.Окуловлан эше икмыняр йочасадым чоҥаш площадкым ямдылаш шӱден.

 – Кызыт чоҥалтше йочасад-влак шотышто сайым гына каласыман. Чыла вережат паша кӱлынак, проект дене келшышын ышталтеш. Но йочасадлаште икшывылан вер садак ок сите, садлан эше икмыняр оралтым нӧлтыман. Тыгодым нуным тугай кундемыште чоҥыман, кушто шуко самырык еш ила. Мыняр чоҥышашым шке паледа, но кок площадке деч шагал огыл лийшаш, – палемден республикым вуйлатыше.

Александр Евстифеев Марий Элын Чоҥымо, архитектур, илыме вер да коммунал озанлык министерствыжланат кӱштымашым пуэн. Тудын дене келшышын, Волжскышто, Козьмодемьянскыште, Звениговышто йочасадым чоҥаш площадкым кычалаш палемден. 

– Йочасадым чоҥымо годым воктенсе кумдыкымат тӱзаташ мондыман огыл. Лӱдыкшыдымылыкымат шотыш налман. Кызыт чоҥалтше ныл йочасадыште тидын шотышто экшык уке. Йочасадын кажне группыж гыч тӱжваке лекме ешартыш омса уло. Чоҥымаште писын ылыждыме материал кучылталтеш. Май мучаш марте ме нине нӧлталтше йочасадлашке эше ик гана миен коштына. Ӱшанем, кок тылзе жапыште ятыр паша ышталтеш, – каласен А.Евстифеев.

Л.ШАБДАРОВА.

Опубликовать в Одноклассники

Добавить комментарий