Кодшо шочмын Марий Эл Кугыжаныш Погын председатель Михаил Васютин дене пресс-конференций лие.
Тушко республиканский да районласе СМИ гыч журналист-влак чумыргеныт. Ик шагатат пеле утла жапыште нуно тӱрлӧ йодышым пуэдышт. Икмынярже Кугыжаныш Погынын у составше да структуржо, тудын тений октябрь гыч але марте шуктымо пашажын икымше иктешлымашыже, закон-влакым лукмо да пеҥгыдемдыме дене кылдалтыныт ыле. Мутлан, ик йодыш тыгай лийын: «Региональный законодательствым федеральный дене шотыш кондымо паша кузе шукталтеш? Тудын мучашыже уло але уке? 100 процентлан шотыш конден керташ лиеш?» Михаил Зиновьевич тыгерак вашештыш: тиде паша нигунамат огеш мучашлалт, молан манаш гын илыш ончыко кая да эре могай-гынат вашталтыш лиеш. Мутлан, специальный военный операций тӱҥалеш манын, иктат шонен огыл, но тудо кызытат кая да СВО-н участникше-влаклан, нунын ешыштлан полшымо шотышто закон-влакым лукташ кӱлын. Моло йодыш шотыштат вашталтыш-влак лийын кертыт.
Журналист-влак депутат-шамычын республикыште илыше-влак дене вашкылышт могай, тудым кузе ыштат манын йодыч. Тыгодымак палемдышт: перестройко деч ончычсо пагытыште горрайсобраний-влакын председательышт депутат-влакын газетлаште шке пашашт нерген каласкалыме графикым эсогыл ыштат улмаш. А кызыт, поснак пытартыш жапыште, калык деч сайлалтше-шамыч сайлымаш деч ончычсо жапыште гына чолгалыкым ончыктат да СМИ-лашке лектыт. Тидын нерген мом шонымыжым йодмылан Михаил Зиновьевич ондакысе пашам сайлан шотлымыж нерген каласыш да тиде опытым уэш кучылташ тӱҥалаш лиеш манын палемдыш.
Кугыжаныш Погынын шушаш 2025 ийлан паша планже нергенат йодышым пуышт. Мутлан, южо регионышто шуко пачеран пӧртлаште олмыктымо, чоҥымо пашам кунам ышташ лийме, а кунам чарнымым шканышт келшышын палемдат. Москваште тидым эсогыл кок кече, шуматкечын да рушарнян, йӧршеш шукташ огеш лий, уке гын штрафым тӱлыктат. Мемнан дене кызыт арняште шым кечынжат 22 гыч 6 шагат эр марте «шып шагат» палемдалтын. Сандене ты шотышто вашталтышым пурташ республикыштына огеш палемдалт мо манын рашемдаш тыршышт. Михаил Зиновьевич кызытеш тыгай темлымаш лийын огыл, но тидым кеч-кӧ ыштен кертеш да, депутат-влак келшен толшылан шотлат гын, законым приниматлен кертыт манын каласыш. А такшым шуко пачеран пӧртлаште еҥ-влак товариществе сынан ушемым ыштат да кунам олмыктымо-чоҥымо пашам ышташ лиймым, кунам чарнымым шке коклаштышт мутланен келшен палемдат.
Михаил Зиновьевичлан эртыше идалык могайрак лийме нерген йодыч. Тудо, кӱчыкынжак огыл каласкалымеке, иктешлыме семын тыгерак вашештыш:
– Мый пиалан айдеме улам – кажне кечын мом-гынат уым пален налам, улан тунемам. Икманаш, чыла сай.
Тылеч вара Михаил Васютин Кугыжаныш Погынын пашаже нерген иктешлыме семын ойлыш, погынышо-влакым шушаш У ий дене саламлыш да поро тыланымашым ойлыш.
Любовь Камалетдинова
Фотом Кугыжаныш Погын гыч налме
