«МАРИЙ ЭЛ» ТАЧЕ УВЕР ЙОГЫН

Вашталтыш лийын да лийшаш

Вашталтыш лийын да лийшаш

Марий Эл правительстве ден Йошкар-Ола администрацийыште кӱкшӧ должностьым налын шогышо-влак коклаште икмыняр вашталтыш лийын да лийшаш.

Марий Эл вуйлатыше Юрий Зайцевын 2024 ий 11 июньысо 104-ше №-ан Указше дене Александр Анатольевич Криворотовым республикын чоҥымо паша, архитектур да илыме вер ден коммунал озанлык министржылан шогалтыме. Тудо министерствыште ик ий веле огыл ыштен, пашам палыше да опытан семын шкенжым ончыктен, палемден республик вуйлатыше.

х х х

Марий Эл вуйлатыше Юрий Зайцевын  2024 ий 13 июньысо 106-шо №-ан Указше дене Станислав Игоревич Крыловым республикын промышленность, экономике вияҥмаш да сатулымаш министрже должность деч утарыме. Тидым шке йодмыж почеш да РФ Паша кодексын 77-ше статьяжын икымше ужашыжын кумшо пунктшо дене келшышын ыштыме, палемдыме указыште.

х х х

Йошкар-Олан мэрже Евгений Васильевич Маслов паша гыч шке кумылын кайыме нерген йодмашым возен. 2024 ий 17 июньышто оласе погынымашын черетдыме сессийже лийшаш, тушто депутат-влак тудын полномочийжым жап шуде чарен шогалтыме нерген йодышым ончат.

х х х

Советский район администрацийын вуйлатышыжлан ыштыме жапыште шкенжым  чын  да сай оза семын ончыктышо Антон Аркадьевич Трудинов у должностьыш куснымыжлан кӧра шке постшым кода. Район погынымашын депутатше-влак 60-шо черетдыме сессийыште тудын йодмашыжым шуктеныт да пашам сайын ыштымыжлан  тауштеныт.

Ты сессийыштак район администраций вуйлатышын сомылжым жаплан шукташ администраций вуйлатышын икымше алмаштышыжлан ышташ тӱҥалше Евгений Александрович Пушкинлан ӱшаныме. Тылеч ончыч тудо «Газпром газораспределений Йошкар-Ола» ООО-што пашам ыштен.

            Ю.ИСАКОВ ямдылен

            Фотом Марий Эл вуйлатышын пресс-службыжо, Йошкар-Ола ден Советский район администраций-влакын сайтышт гыч налме

Опубликовать в Одноклассники

Добавить комментарий