Рушарнян, 18 августышто, Йошкар-Олаште «Врач дене ик шагат ошкылмаш» акцийын черетан мероприятийже эртен.
Ты гана регионысо калык Фёдор I Иоаннович кугыжан Воскресенский набережныйыште верланыше памятникше воктеке погынен да Марий Элын Тазалыкым аралыме министерствыжын тӱҥ внештатный специалист-стоматологшо, врач-стоматолог-хирург Дмитрий Зверев дене вашлийын. Изи Какшан эҥер сер мучко ик шагат ошкылмо жапыште медицине пашаеҥ пӱй корштымо амал, кариес, фторын пайдалыкше нерген каласкален, пӱйым эрыктыме эн сай пасте дене палдарен, тыгак тӱрлӧ йодышлан вашештен.
М.ИВАНОВА
