Таче Марий Эл Кугыжаныш Погынын председательже Михаил Васютин Корно озанлык пашаеҥ-влакын кечыштлан да республикын корно отрасльжылан 95 ий теммылан пӧлеклалтше торжественный мероприятийыште участвоватлен.
Пайрем Я.Эшпай лӱмеш Марий кугыжаныш филармонийыште эртен. Михаил Васютин корно организаций-влакын, Корно озанлык да транспорт министерствын специалистышт ден ветераныштым пайрем дене саламлымыж годым кундемыштына 1929 ий 1 ноябрьыште ыштыме корно отрасльын регионым социально-экономически вияҥдымаште ик эн кӱлешан улмыжым палемден. Таче корно пашаеҥ-шамыч «Лӱдыкшыдымӧ да качестван автомобиль корно» национальный проектым илышыш пуртымаште кугу задаче-влакым решатлат.
«Автомобиль корным чоҥымо да олмыктымо годым кучылтмо поян опытда ден профессионализмда, инноваций технологий-шамычым шыҥдарымыда республикыштына проектым илышыш сайын пурташ негыз лийыт», – мероприятийын участникше-влаклан ӱшанжым ончыктен ойлен депутат корпусын вуйлатышыже да чылалан тазалыкым, сай илышым, пашаште куаным, сулен налме пагалымашым тыланен. Поснак корно озанлыкын ветеранже-шамычлан тауштен.
Тиде кечын пашам шуко ий да сайын ыштымылан, кӱкшӧ профессионализмым ончыктымылан, корно отрасльым вияҥдымашке шке надырым пыштымылан Кугыжаныш Погынын тауштымашан серышыжым «Марийскавтодор» АО-н специалистше-влаклан – автомобиль корным кучымо да аралыме пӧлкан начальникше Елена Исакова ден технический надзор пӧлкан тӱҥ специалистше Рияз Щигаповлан – кучыктымо.
М.ИВАНОВА
Марий Эл Кугыжаныш Погынын фотожо
