КУЧЕМЫШТЕ

Ятыр вере кӱварым чоҥат, корным ачалат

«Лӱдыкшыдымӧ да сай качестван корно» нацпроект дене келшышын, тений Марий Элыште чылаже 276 километр корным шотыш кондат.

Тидын нерген Марий Эл вуйлатыше Юрий Зайцев ден транспорт да корно озанлык министр Александр Герасименко мутланеныт.

Министрын ойлымыж почеш, 2023 ийыште тӱрлӧ значениян  автомобиль корным тӧрлаташ 4,2 млрд. утла теҥге ойыралтеш, тышеч 2 млрд. – федеральный бюджет гыч.

Йошкар-Ола агломерацийыш пурышо корным ачалаш тений 448 млн. утла теҥге ойыралтын. 368 млн. наре теҥгежым Киров ден Строитель урем-влакым ушышо магистральым чоҥымо икымше этапым мучашлаш колташ палемдалтеш.

Александр Герасименкон каласкалымыж почеш, кызыт 12 кӱварым олмыктымо паша кая. Нунын кокла гыч иктыже Йошкар-Олаште верланен. Кызыт Морко районышто Кӧкрем – Петровский автомобиль корнышто Ировка эҥер гоч кӱварым чоҥаш тӱҥалыныт. Тудым вес ийын ыштен шуктышаш улыт.

Палдарымыж почеш, чылаже 21 объектыште паша кая. Тиде теве могай автомобиль корно ужашлаште: Куяр – Солнечный – Роҥго, Упшо – Хорошавинский, Алексеевский – Кугу Кодам – Какшанмучаш, Кузнецово –  Юшково, Оршанке – Какшанмучаш – У Торъял, Шернур – У Торъял, Одывлак –Кужэҥер – Параньга, Алексеевский – Михайловка – Андреевка. Кызыт Красный Мост – Килемар – Шараҥге, Звенигово – Шолэҥер – Морко, Звенигово – Памар корно ужашлаште ты пашам тӱҥалаш ямдылалтыт.

– Республикыште корным чоҥымо паша сайын кая. Южо регион дене таҥастарымаште, Марий Эл – ончылно. Но мемнан задачына – чыла пашам  качественно да палемдыме жап дене келшышын шукташ. Объектлашке шкан лектын кошташ, корным шотыш кондымо йодышым эреак контрольышто кучаш кӱлеш, – каласен Юрий Зайцев.

Марий Эл Республикым вуйлатышын администрацийжын информаций паша пӧлкажын уверже негызеш Л.Камалетдинова ямдылен

Опубликовать в Одноклассники

Добавить комментарий