11 мартыште Марий Элым вуйлатыше Александр Евстифеев посна еҥ-влаклан эмлыме препарат ден медицине арверым яра ситараш ешартыш средствам ойырен.
Документ дене келшышын, Марий Элын Тазалык аралтыш министерствыже тиде цельлан 150 миллион теҥгем налеш.
Тиде суммо гыч 140,5 миллион теҥгеаш бюджет ассигнований посна еҥ-шамычлан, ты шотыштак сакыр диабет, илышлан лӱдыкшым ыштен кертше да шуэн вашлиялтше (орфанный) тӱрлӧ чер, лимфоидный, вӱрым ыштыше да нунын гайрак ткань-влакын осалын пуалмышт, гемофилий, муковисцидоз, гипофизарный нанизм, Гошен черже, склероз дене орланыше, тыгак иктаж органым але тканьым кусарен шындыктыше-влаклан, эмлыме препарат ден медицине арверым ситараш, тылеч посна нуным аралыме, кондыштарыме да пуэдыме услыгылан тӱлаш палемдалтын.
Средстван вес ужашыже – 9,5 миллион теҥге – Республиканский онкологический диспансерын радиологический отделенийжын леведышыжым олмыкташ ойыралтын. Тиде зданийыште айдемын онкологий дене черланен кертмыжым рашемдыме да пациент-шамычлан лучевой терапийым эртарыме шергакан медицине оборудований-влакым вераҥдыме.
Марий Эл Республикым вуйлатышын организаций да аналитике виктемжын уверже негызеш М.ИВАНОВА ямдылен
