Йошкар-Оласе Интеграл микрорайон воктенысе промзонышто чыла предприятийым тергат.
Марий рӱдоласе калыкын воктен верланыше промышленный кумдыклан кӧра южын качествыжлан вуйым шиймыжым шотыш налын, Марий Элым вуйлатышын пашажым жаплан шуктышо Юрий Зайцев Интеграл микрорайонысо ситуаций дене кылдалтше йодыш шотышто совещанийым эртарен.
«Йодыш пӱсын шога. Мый шым ӧркане, тушко шке миен коштым, калык дене мутланышым. Тылеч посна, мыланем уже икмыняр видеом колтеныт. Уремыште – йӱд, а тушто шикш деч посна эше ала-мо мӱгыра, пуйто кӱм луктыт. Тудо вич шагат эрденак тӱҥалеш. Тиде сай огыл. Ситуацийым тӧрлаш кӱлеш. Мый тиде йодышым шотыш налде ом керт. Чыным садак кычал муам да титаканым рашемдем», – палемден Ю.Зайцев.
Республикым вуйлатышын пашажым жаплан шуктышо Марий Элын пӱртӱс поянлык, экологий да йырвелым аралыме шотышто министрже Алексей Киселевын, Йошкар-Олан мэрже Евгений Масловын, регионын прокуроржо Сергей Беляковын, Роспотребнадзорын Марий Элысе виктемжым вуйлатыше Светлана Булатован, тыгак марий район-влак кокласе пӱртӱсым аралыме прокурорын пашажым шуктышо Сергей Валитовын шонымашыштым колыштын.
Совещанийын кажне участникше тиде ситыдымашым кораҥдымаште мом ыштымыж нерген каласкален.
Ю.Зайцев Интеграл микрорайон воктенысе промзонышто пашам ыштыше предприятий-шамычын собственникыштым рашемдаш, пашаштын юрлицан уставной документше-влак дене келшен толмыштым тергаш кӱштен. Тылеч посна, озанлыкым кучышо субъект-влакын шӱкшакым закондымын йӱлалтымышт татыште тергымашым эртараш каласен.
Кызытсе технологий-влак могай шӱкшакым йӱлалтымым ломыжын пробыжо негызешат рашемдаш йӧным ыштат, ешарен Юрий Зайцев.
Регионым вуйлатышын пашажым жаплан шуктышо экологийым саемдыме шот дене микрорайонышто пушеҥгым шындаш, Строитель ден Машиностроитель уремла корнывожышто транспорт погынымо ситыдымашым кораҥдаш задачым шынден.
Марий Эл Республикым вуйлатышын организаций да аналитике виктемжын уверже негызеш М.ИВАНОВА ямдылен
