Марий Эл вуйлатышын пашажым жаплан шуктышо ден Чуваший вуйлатыше вашкылым ыштыме нерген соглашенийым подписатленыт.
Тиде ойпидышыште икмыняр сфер палемдалтын: увер коммуникаций, транспорт, промышленность, агропромышленный комплекс, торговльо да услуго, архитектур, чоҥымаш, илыме вер-коммунал озанлык, кундемым тӱзатымаш, здравоохранений, образований.
Кок велымсе кылым кумдаҥдымаш Юрий Зайцев ден Олег Николаевын Петербургышто эртыше тӱнямбал экономический форум жапыште ыштыме ойпидыш дене келшышын шукталташ тӱҥалеш.
Нуно тыгак патриотический мероприятий-влакым иквереш эртарыме шотышто мутланеныт. Чуваший вуйлатыше регионыштышт мемориал комплекс-влакым чоҥымо нерген ойлен да иктыжым почмашке Юрий Зайцевым ӱжын. Тидын дене пырля Олег Николаев тудлан «Российын тӱрлымӧ картшым» ончыктен. Ик ужашыжым, Марий Элым, Звенигово ола гыч кидмастар-влак тӱрленыт.
Форум жапыште Марий Эл вуйлатышын пашажым жаплан шуктышо республикын Кугыжаныш Погынжын депутатше, «Мы вместе» акций кышкарыште гуманитарный полышым пуышо федеральный штаб вуйлатыше Василий Бочкарев дене вашлийын.
Марий Эл Республикым вуйлатышын организаций да аналитике виктемжын уверже-влак негызеш Л.Камалетдинова ямдылен.
