Ю.Зайцев: «Тиде – шокшым кергалтен пашам ыштыше да мемнан ӱстембалне кажне кечын тамле кочкыш йӧрвар лийже манын тыршыше еҥ-влакын пайремышт».
Марий Эл вуйлатышын пашажым жаплан шуктышо Юрий Зайцев 10 июньышто ялозанлык производитель-влакын республиканский пайремыштышт – Медведево поселкысо ипподромышто эртыше Пасун кечыштыже – лийын.
Пайремыш погынышо, тудым эртарыше да уна-влакым саламлымыж годым Юрий Зайцев эллан кочкыш лӱдыкшыдымылыкшым ситарыме шотышто республикысе ялозанлык производитель-влакын кугу рольыштым палемден.
– Тачысе кечылан мемнан дене 300 тӱжем утла гектарыш ӱдымӧ. Марий Эл ны пырчан, ны пурсан культур, ны пакчасаска шотышто чӱдылыкым огеш шиж. Тиде сай. Но умбакыжат вияҥман да ончыко кайыман. Молан манаш гын, ялозанлык отрасль ончыкылан ӱшаным пуа. Россий президент тыгай задачым шынден: чылажымат шкан шке ситараш, – палемден Юрий Зайцев.
Умбакыже тудо ялозанлык технике парадым ончен, тылеч вара специализированный выставкыште лийын да предприятий вуйлатыше-влак дене мутланен. Посна кугу тӱткышым «Кировец» тракторлан ойырен да тудым лукшо «Агрокомплект» акционер ушемын вуйлатышыже-влак дене палыме лийын. Нуно Марий Эл дене утларак пеҥгыде кылым ышташ шонымышт нерген ойленыт.
– Выставке мучко эртымеке, каласен кертам: тудо мылам келшыш. Тыште ончыкталтше технике йот элласе деч нимо денат уда огыл, – палемден республик вуйлатышын пашажым жаплан шуктышо.
Пасун кечышкыже тений 60 утла предприятий ушнен.
Марий Эл Республикым вуйлатышын организаций да аналитике виктемжын уверже-влак негызеш Л.Камалетдинова ямдылен.
