КУЧЕМЫШТЕ ОБРАЗОВАНИЙ УВЕР ЙОГЫН

Вуз-влак тунемме ийлан ямде улыт

Юл кундем кугыжаныш технологий да Марий кугыжаныш университет-шамыч туныктымо пашаш инноваций технологийым шыҥдарат. Нуно образовательный программыштым регионын вияҥме задачыже дене келшышын уэмдат.

Юл кундем кугыжаныш технологий университетын ректоржо Игорь Петуховын палемдымыж почеш, кугу тӱткыш IT-направлений-влаклан ойыралтеш. Шушаш тунемме идалыкыште ММЗ АО дене пырля локаций системе областьыште инженер школым, тыгак вузын инноваций йӧнжым вияҥдаш палемдыме. Тидын деч посна «Профессионалитет» федерал, инфраструктур социальный проект-шамычым илышыш шыҥдараш да искусственный интеллект программе кышкарыште пашам ышташ палемдыме.

Чылаже вузыш 2774 еҥ тунемаш пурен. Магистратур да кыдалаш профессионал образованийын программылаж дене очно тунемаш налме план тичмашнек темын. Моло формо дене тунемаш налме приём умбакыже шуйна. ПГТУ-н ректоржын мутшо почеш, тӱшкагудо-влак у тунемме ийлан ямде улыт. «Шинчымаш кечым палемдыме кышкарыште торжественный линейке лиеш, студент-влаклан ончыл профессор-влакын лекцийыштым лудыт. Тидын деч посна ты кечын вузлан 90 ий теммыжлан Учёный советын торжественный заседанийжым эртараш палемдыме. А студент коллектив-влак концертышт дене куандараш тӱҥалыт», – увертарен Игорь Петухов.

Марий кугыжаныш университет черетан тунемме ийым «Приоритет-2030» программын участникшын статусыштыжо вашлиеш. Каласыман, тиде – вуз-влакын вияҥмышт шотышто ик эн кугу федерал проект. Тидын нерген республикым вуйлатышын пашажым жаплан шуктышо Юрий Зайцевлан университетын икымше проректоржо Олег Сидоров палдарен. «Мемнан вуз Российым обороно могырым вияҥдыме, радиоэлектронике, микробиологий да моло дене кылдалтше кугу шанче проектлаште умбакыжат чолгалыкым ончыкташ тӱҥалеш. Сентябрь тӱҥалтышлан Марий кугыжаныш университет

импортым алмаштыме да шкенан элысе микроэлектрон промышленносьлан кадрым ямдылыме проект кышкарыште Печатлыме платым ыштыме да тиде областьлан пашаеҥ-влакым ямдылыше рӱдерым почаш палемденна», — каласен Олег Сидоров.

Тыгак тенийысе тунемме идалык гыч вузын «Ушан пӧрт» ден «Сити-фермерстве» у лабораторийлаштыже «ушан технологийлан» студент-влак гына огыл, кумылан моло еҥ-шамычат тунем кертыт.

МарГУ-н икымше проректоржо 2022 ийысе приёмный кампаний сайын эртен манын палемден. 100 утла направлений да специальность дене 9,5 тӱжем студент тунемаш тӱҥалыт, тышеч 2136 еҥ – бюджет верыште. Абитуриен-влак коклаште шукынжо тыгай направлений дене шинчымашым налаш кумылан лийыныт: эмлыме паша, педиатрий, юриспруденций, психолого-педагогический образований, экономике, йот йылме-влак, увер системе да технологий-влак, Олег Сидоровын ойлымыж почеш, вузын инфраструктуржо студент-влакым туныкташ ямде. «Тений 25 ноябрьыште Марий Элыште университет образованийлан да Марий кугыжаныш университетлан – 50 ий. Пагалыме Юрий Викторович, вузын уло пашаче ешыжын лӱмжо дене Тыланда да республикын правительствыжлан  университетнам вияҥдаш да тудын лӱмгечыжым палемдаш полшен шогымыланда тауштена», – каласен тудо.

Юрий Зайцев вуз-влакын вуйлатышыштым да тушто пашам ыштыше-шамычым у тунемме ийлан ямде улмыштлан тауштен да республикыште университет образованийлан 50 ий теммым сай кӱкшытыштӧ эртараш кӱлмӧ нерген каласен.

Марий Эл Республикым вуйлатышын организаций да аналитике виктемжын уверже негызеш Г.Кожевникова ямдылен.

 Д.Речкинын фотожо

Опубликовать в Одноклассники

Добавить комментарий