Эртыше кечылаште Волжский районысо Приволжский кыдалаш школышто Марий Элын сулло тренерже Г.З.Мухамедзяновым шарныме лӱмеш бокс дене эртыше кандашымше турнирыште республикнан тӱрлӧ кундемже да пошкудо Татарстан Республик гыч 130 утла спортсмен вийжым терген.
Тиде таҥасымаш ынде йӱлашке савырнен. Жапше годым Гумар Купсола селаште бокслан вияҥаш тӱҥалтышым ыштен. Тудын воспитанникше-влак сай кӱкшытыш шуыныт. Икмынярышт тренерын корныжымат ойырен налыныт. Мутлан, таче кечылан тудын пашажым ты кундемыште тренер А.Степанов шуя. Турнирын организаторжат тудак лийын.
– Таҥасымаш эреак сай кӱкшытыштӧ эрта. Тушко участник-шамыч кумылын ушнат. Турнирыште ты гана икымше верым Волжск, кокымшым Озаҥ, кумшо верым Йошкар-Ола гыч команде-влак налыныт, – ойла Александр Васильевич. – Технике шотышто эн сай боксёр семын Озаҥ ола гыч Даниил Харьковскийым (52 кг) палемдыме. Волжский муниципальный район администраций вуйлатышын кубокшым Волжск дене ты районысо командылан кучыктеныт. Оза-влак коклаште тӱрлӧ тӱшкаште 9 еҥ финалыште вийжым терген. Тидыже начар огыл результат.
Турнирым тӱҥ шотышто шке кӱшеш эртареныт. Ты гана эше Пашам ыштыше самырык еҥ-шамычын ушемышт полшен.
– Мероприятий чынжымак пеш сай кӱкшытыштӧ эртыш, – пеҥгыдемда Волжский районышто физкультур ден спортлан вуйын шогышо А.Михайлов. – Тидым палемден кодыман: турнирын организаторжо Александр Степанов сеҥыше ден призёр-влаклан сай пӧлекым ышташ спонсор-шамычым шкеак кычалеш, муэш. А таҥасымашке участникат, ончышат путырак шукын погынат.
Бокс дене черетан вес турнир 16-18 ноябрьыште Козьмодемьянскыште лиеш.
А 14-16 декабрьыште Йошкар-Олаште Российын Геройжо Марк Евтюхиным шарныме лӱмеш бокс дене Марий Элын чемпионатше ден первенствыже эртат.
Е.Эшкинина.
