Россий МЧС-ын республикысе Тӱҥ управленийжын ГИМС специалистше-влак кундемысе эҥер ден ерлаште ийын кӱжгытшым, тудын кузе шулымыжым шерын лектыныт.
Тыге, Юрино ден Козьмодемьянск олала воктене йоген кайыше Юл эҥерын фарватерже , суднын ийын коштын кертме вӱд корныжо, ий деч утлен. Сандене «Козьмодемьянск — Коротни» маршрут дене коштшо паром кодшо шуматкечын угыч пашам ышташ тӱҥалын.
Юл эҥерыштак Дубовский, Шыкшансола, Алатай, Пынжедыр затонлаште тыгак вӱд налын, ий сер деч торлен. Кодшо каныш кечылаште кечывалым Курыкмарий районысо Владмирский села деч тораште огыл колызо-влак туткарыш логалыныт. Эҥерысе ий шулен толмылан да вӱд лекмылан кӧра нуно серыш лектын кертын огытыл. Утарыше-влак деке полышым йодын йыҥгыртеныт. Верыш миен шушо специалист-влак 10 колызым вӱдыштӧ патрулироватлыше «юж кӱпчыкан» судно дене эвакуироватленыт.
Изи Какшан эҥерыште колызо-влак эше шукын койыт. Ийын кӱжгытшӧ 35-50 сантиметр наре лиеш. Но ий сер деч торлаш тӱҥалын. Республикысе эҥер ден ерлаште ийын кӱжгытшо 45- 50 сантиметрыш шуэш.
«Ийын структуржак вашталтын,- палемдат специалист-влак.- Ийжак вӱдым пога да «шуркалыше» лиеш. Кӱшыч веле огыл, ӱлычынат шулен толеш». Ийже кӱжгӧ гынат, шӱштырга да тудын ӱмбаке вочшо нелылыкым чытен кертдымыш савырна. Чыла тидым шотыш налын, ГИМС-ын специалистше-влак тыгай пагытыште колызо-влаклан ий ӱмбаке лекташ чарат. Кртический сиутацийыш логалше-шамычлан 112 номерыш йыҥгырташ йодыт.
С.Носова.
