1 майыште республик кӱкшытан тыгай профсоюзный фестиваль-конкурс иктешлалтын.
Тушто ойыртемалтше пашаче династий-влакым Йошкар-Оласе тӱвыра да каныме рӱдӧ паркыште чапландареныт. Нуным саламлаш регион вуйлатыше Юрий Зайцев миен.
– Российын президентше Владимир Путин каласен, Шочмо Элнан эрыкан ончыкылыкшо проста пашазе-влакын кидышт дене ышталтеш. Нуно цехлаште да сборочный линийлаште, пасу ден шахтылаште, конструктор бюрола ден научный рӱдерлаште, тунемме класслаште але медицине кабинетлаште кыртмен тыршат да лач тидын дене кугыжанышнам, Марий кундемнам виянракым ыштат. Икымше Май – лач нунын пайремышт, – палемден Марий Эл вуйлатыше.
Ты конкурсын кӱлешлыкшым тудо кӱкшын аклен, вет тыгай династий, наставник, самырык специалист-влакым чапландарымаш пашаче айдемын кӱлешлыкшым ончыкта, профессийын престижшым нӧлта.
Тенийысе фестиваль-конкурсышто «Тукым гыч тукымыш куснымаш» номинацийыште сеҥыше-влак Марий Эл вуйлатышын Тауштымашан серышыж дене палемдалтыныт. Нунын еш династийыштын тӱшка стажше 50 ий утла наре лиеш. Тӱрлӧ профессиян пашаче династий-влак коклаште сеҥышыш лектыныт:
– республикысе Калык усталык рӱдерыште артистлан, хореографлан, музыкантлан ыштыше Дмитриевмыт (ныл еҥын тӱшка паша стажше – 102 ий),
– Морко централизоватлыме клуб системын Шеҥше социально-культурный комплексыштыже тӱвыра пашаеҥлан ыштыше Николевмыт-Хамидуллинмыт (куд еҥын тӱшка стажше – 134 ий),
– Йошкар-Оласе икымше ТЭЦ-ыште ыштыше Никулинмыт (7 еҥын тӱшка стажше – 113 ий),
– Марий машиностроитель заводышто ыштыше Писаревмыт-Зиятдиновмыт-Лежнинмыт (12 еҥын тӱшка стажше – 270 ий да 8 тылзе),
– Туныктышо Соловьёвмыт-Чернышовмыт (10 еҥын тӱшка стажше – 248 ий),
– Юрино лесничествыште чодыра пашаште ыштыше Старцевмыт-Ивановмыт (9 еҥын тӱшка стажше – 307 ий).
Юрий Зайцев чылаштлан тауштен да каласен: «Мемнан элыште тукым гыч тукымыш куснен толмо пашам шуктымаш ончыкыжымат лиеш. Тиде мемнан шочмо элнан йӱлаже. Кунам ава шӧр дене койыш-шоктыш, ачан шомакше деч шочмо элым йӧратымаш куснат, еш кокласе вашкыл – чыла тиде мемнан вӱрыштак шинчат».
Марий Эл вуйлатышын пресс-службыжын уверже негызеш Светлана Носова ямдылен.
