Марий Элыш Москошто да Санкт-Петербургышто суртдымо- печыдыме еҥ-влаклан полшышо поро кумылым ончыктымо «Ночлежка» организацийын еҥже-влак толын каеныт.
Йошкар-Олаш толаш амалже – илыме вер деч посна кодшо-влаклан социальный полышым пуымо шотышто «йыргешке ӱстел» йыр мутланымаш. Марий рӱдолаште тыгай полышыжым «Йӱдым эртарыме пӧрт» пуа. Кажне ийын ты учрежденийыште 200 наре еҥ социальный полышым налеш. Кызыт регион вуйлатыше Юрий Зайцевын кӱштымыж почеш, ты социальный унагудым уэмден олмыктат.
Мутланымашке республикысе Пашада калыкым социально аралыме министерствын социальный обслуживаний пӧлкажым вуйлатыше Наталья Мустафинат ушнен. «Йӱдым эртарыме пӧрт директорын, пашаеҥже-влакын ойлымышт почеш, мемнан регионышто илыме вер деч посна кодшо-влаклан ты социальный учреждений тӱрлӧ сынан полышым пуа: вургемым ойыра, медосмтрым эрташ мобильный бригадым ӱжеш, родо-тукымышт дене кылым ышта, паша верым темлыше органыш направленийым пуа.
«Йыргешке ӱстелыште» тыгак илыме вер деч посна кодшо-влак дене пашам ыштыше коммерческий огыл организаций, инициативный тӱшка-влак вашкылым ыштыме дене кылдалтше йодышлам каҥашеныт.
Светлана Носова
Фотом Марий Элын Паша да социальный аралтыш министерствыжын соцкыл лаштыкше гыч налме.
