Марий Эл Республикын правительствыже Запорожский областьысе ик районышто социально кӱлешан объект-влакым шотыш кондаш полша.
Запорожский областьысе илемлаште шотыш кондаш кӱлмӧ объектлаште паша радамым ыштыме нерген 25 майыште Россий Федерацийыште Региональный вияҥмаш шотышто правительственный комиссийын президиумжын (штабшын) заседанийыштыже мутланеныт. Тушто видеоконференций йӧн дене Марий Эл правительстве председательын алмаштышыже Дмитрий Троицкий участвоватлен.
У регион-влакын 2023-2025 ийлаште социально-экономически вияҥме программыштым пеҥгыдемдыме, паша радамым 2030 ий мартеат ыштыме, палемден вице-премьер.
«Программын мероприятийже-влак у регионлаште инфраструктурым вияҥдымашке виктаралтыныт. Нуным илышыш пурташ эше 26 субъект ушнен. Келшыше пунчалым кызыт Россий Федераций президентлан пеҥгыдемдаш колтымо», – рашемден Марат Хуснуллин.
Марий Эл гыч представитель-влак Юрий Зайцевын вуйлатымыж почеш 24 майыште Запорожский областьын ик районыштыжо лийыныт, олмыкташ палемдыме объект-влакым ончен савырненыт.
Республикын правительствыже социально кӱлешан объектлаште коммунал инфраструктурым шотыш кондаш полша. Эн ончычак тӧнеж-шамычым ырыктыме пагытлан ямдылен шукташ кӱлеш. Марий Элым вуйлатышын кӱштымыж почеш кажне объект шотышто пашан ойыртемже ден тудым шуктымо жапым палемдыман мероприятий-влак радамым ыштыме.
Запорожский областьын правительствыж дене кылым ыштыме, Марий Эл Минстройын еҥже-шамыч шефствыш налме кумдыкын объектлаштыже лийыныт, мероприятий-влак график дене келшышын шукталташ тӱҥалыт, палемден регионым вуйлатыше.
Ю.Зайцев инфраструктурым шотыш кондымо паша да образований ден калыкым социально обслуживатлыме алан дене кылдалтше чыла йодышым шке контрольыштыжо кучаш сӧрен.
Марий Эл Республикым вуйлатышын администрацийжын информаций паша пӧлкажын уверже негызеш М.ИВАНОВА ямдылен
