Таче «Единая Россия» партийын марий региональный отделенийже сайлымашын иктешлымашыже шотышто брифингым эртарыш.
Регионысо отделенийын вуйлатышын пашажым шуктышо Антон Волков тыге палемдыш:
– «Единая Россия» партий респрубликысе законодательный ден представительный кучем органлашке чыла кӱкшытыштат сайлымаште ӱшанлын сеҥен. Тиде партий верч йӱклышӧ еҥ-влаклан ме таум ойлена.
СВО-н участникше-влак нерген посна ойлыман. Эн ойыртемалтше представитель-влак Борис Салдаев, Александр Смирнов, нуно коктынат Марий Эл Кугыжаныш Погыныш сайлалтыныт, да Григорий Кузнецов, тудо Йошкар-Оласе погынымашыш мандатым сеҥен налын, лийыныт.
Тудо лачшымак кушто мыняр мандатым сеҥен налме денат радамлын палдарыш.
Тылеч вара 7-ше созыв Кугыжаныш Погын председательын алмаштышыже, кызытсе сайлымаштат сеҥышыш лекше Наталья Козлова ден СВО-н ветеранже, ты сайлымаште депутат мандатым налше Григорий Кузнецов ончыкыжым партийын командыштыже тыршен пашам ышташ ямде улмышт нерген ойлышт.
Эртыше сайлымаш нерген Марий Эл вуйлатыше Юрий Зайцев телеграм-каналыштыже тыге палемден:
– Республикыште уло чот гыч пелыже утла избиратель элнан Президентше Владимир Владимирович Путинын курсшым поддерживатлыше «Единая Россия» партий верч йӱклен.
Сеҥыше-влакым саламлем! Икоян команде дене ме регионнам вияҥдышашлан задаче-влакым кӱлеш семын шукташ тӱҥалына. Пашам шуко ышташ логалеш, но тыгай состав дене ме чылажымат ыштен кертына манын, ом кокытелане.
Ӱшаным ыштымылан тау. Ончыко гына!
Любовь Камалетдинова
Снимкыште: брифингыште (шола гыч пурлашке) Наталья Козлова, Антон Волков, Григорий Кузнецов
Авторын фотожо
