Марий Элыште школышто тунемше-влаклан Россий кӱкшытан олимпиадын регионысо йыжыҥже тӱҥалын.
У ий каныш деч вара икымше паша кечын Юл кундем кугыжаныш технологий университетыште 9-11-ше класслаште тунемше-влак экономике дене заданийым шуктеныт.
Ӱдыр-рвезе-влаклан Марий Эл образований да науко министр Лариса Ревуцкая сеҥымашым тыланен да каласен: «Олимпиадын регионысо йыжыҥже – таҥасымаш гына огыл, тиде интеллект могырым кушмо точко. Ме кажныда дене кугешнена да сеҥымашдалан ӱшанена, а сеҥыше-влак Марий Элын чапшым олимпиадын пытартыш йыжыҥыштыже аралаш тӱҥалыт, тидын дене мемнан кундемысе образований качествын кӱкшытшым пеҥгыдемдат».
Экономике дене олимпиадын результатше дене 26 январьыште Марий Элын образовательный порталыштыже палдарат.
Уш-акыл таҥасымаш республикыштына 28 февраль марте шуйна. Чылаже олимпиадыште 1300 утла ӱдыр-рвезе шинчымашым ончыкта.
Г.Кожевникова
Фотом Марий Эл Образований да науко мининстерствын соцкылысе лаштыкше гыч налме
