УВЕР ЙОГЫН

Моло дене пырля – Марий Элат

Марий Элым вуйлатыше Александр Евстифеев Россий президент Владимир Путинын губернатор-влак дене эртарыме совещанийыштыже участвоватлен.
Эше 11 май йотке канена
28 апрельыште Российын президентше В.Путин элнан субъектлажым вуйлатыше-шамыч дене коронавирус инфекцийын шарлымыж ваштареш шогымо шотышто видеоконференцийым эртарен. Шке выступленийыштыже тудо кучем-шамычын коронавирус дене кучедалме шотышто у позицийыштым да регион-влакын чарыме режим гыч 12 май деч вара эркын дене лекташ тӱҥалмыштым палемден. Тидын дене келшышын, В.Путин РФ правительствылан бизнеслан полшымо мере-влакым ямдылаш кӱштен. Тылеч посна тудо 6-8 май пагытым пашам ыштыдыме кече семын увертарен. Рашемденрак каласаш гын, граждан-влак 1 гыч 11 май йотке пашадарым йомдарыде канат.
28 апрель – Вашкеполыш пашаеҥын кечыже
Российын президентше тыгак вашкеполыш службын пашаеҥже-шамычлан официальный пайремым учредитлен да 28 апрельым Вашкеполыш пашаеҥын кечыже семын увертараш темлен.
Пырля тыршыме лектыш
«Ме эпидемийым шарлымыж деч чарен кертынна. Тиде паша – пырля тыршыме лектыш, врач ден специалист-шамычын каҥашыштым колыштшо да шотыш налше, шке тазалыкым эскерыше да лишыл-влак верч азапланыше, кучем орган-влакын темлымыштым шуктышо элысе миллион дене гражданын ответственностьшо. Коронавирус инфекций дене авалталтше-влакым кече еда рашемдыме у случай мыняр-гынат пеҥгыдемын. Специалист ден шанчызе-влак – а ме нунын дене чак пашам ыштена, планна ден ончыкылык ошкылнам таҥастарена – пикым эше эртен огынал маныт», — каласен В.Путин.
Эпидемий – пеҥгыде контрольышто
Эпидемий тӱҥалме жап гыч 28 апрель марте Марий Элыште COVID-19 дене инфицироватлалтме 500 случайым официально регистрироватлыме. Пытартыш суткаште рашемдыме 38 случай гыч 28 еҥ тымарте черланыше дене кылым кучен, 10 граждан республикыш вес регион гыч толын. Тыге, черланыше-влакын чотышт суткаште 8,2 процент лийын.
Мониторинг жапыште республикысе лабораторийлаште чылаже 16835 шымлымашым эртарыме.
1511 еҥым, ты шотыштак у коронавирус инфекций дене авалталтын кертыныт манын шонымо 1502 гражданиным, медицине велым эскерат. Ты учёт гыч 3954 еҥым кораҥдыме.
Инфицироватлалтмым рашемдыме чыла случайыште эпидемиолог-влак эпидемий талышныме деч палемдалтше мероприятийым тичмашнек эртареныт. Регистрироватлыме чыла случайыште черле дене кылым кучышо-влакым: ешыжым, лишыл еҥже, пашам пырля ыштыше-шамычым, — рашемдыме. Изоляцийыште да карантиныште улшо-влакым элкӧргӧ органын еҥже-шамыч контрольышто кучат. Пунчалым пудыртышо-влакым административно мут кучаш шогалтен кертыт.
Шым стационарыште – 470 койко
Коронавирусан пациент-влаклан республикыштына шым организаций медицине полышым пуа. Чылаже 470 койкым ямдылыме, тышечын 340 койкыжо – норматив почеш, 130 койкым ешарен шындыме. Кажне койкылан кислородым налме.
Чылажге латиктын куснат
Марий Элын Социальный вияҥмаш министерствыжын ведомствышкыжо пурышо социально обслуживатлыше организаций-влак 15 апрель гыч социальный услугым налше-влак дене пырля шке кумылын самоизоляций режимыш куснат. Таче кечылан тыгай форматыште шым тӧнеж пашам ышта. Рашемденрак каласаш гын, 198 пашаеҥ услугым налше 909 еҥым шке тӧнежыштак мӧҥгыш лекде онча.
Самоизоляцийыш эше Красногорский, Кожласола, Кундыштӱр психоневрологический интернат-влакым да Илалше ден инвалид-шамычлан палемдалтше Карлыган интернат-пӧртым колташ ямдылат. Тыге, посна улмо режимыш 126 пашаеҥ ден социальный услугым налше 900 граждан куснат.
Волонтёр штаб полша
Регионыштына Самырык-влакын полатыштышт верланыше Добровольчествылан полшышо ресурс рӱдерыште коронавирус инфекций шарлыме жапыште калыклан полшышо #МЫВМЕСТЕ волонтёр штаб пашам ышта. Тушто 271 волонтёрым регистрироватлыме. 28 апрель марте республикыште илыше-шамыч деч 491 йодмашым налме да шуктымо.
Волонтёрын полышыж дене пайдаланаш лийме да «шокшо линийын» телефонжо нерген увер Интернет сетьыште да регионысо СМИ-ште кече еда эрта.

Марий Элым вуйлатышын организаций да

аналитике виктемжын уверже негызеш М.ИВАНОВА ямдылен

Опубликовать в Одноклассники

Добавить комментарий