УВЕР ЙОГЫН

Идалык мучашлалтмеш эше нылле визытым олмыктат

Вич ий ончыч тӱҥалтышым налше, Шуко пачеран пӧртлаште тӱшка погым капитально олмыктымо программе вич ий ончыч тӱҥалтышым налын. Кызыт тудын  илышыш шыҥдаралтмыже ятыр озам куандара. Мэрын икымше алмаштышыже Л.Покровскийын ойлымыж почеш, тиде программе дене келшышын, тӱҥалтыште рӱдолаште лу пӧртым веле капитально олмыктымо гын, пытартыш кок ий жапыште шӱдӧ утлам шотыш конден шуктымо. Тыгеже чылажге 204 пӧртым олмыктымо. Тидлан 946 миллион теҥгем кучылтмо.

Марий Эл вуйлатыше Александр Евстифеевын кӱштымыж почеш, ола администраций пӧртым олмыктымо качествым тӱткын эскера да контрольышто куча. Капитально олмыктымаш программе полшымо дене Йошкар-Оласе Димитров уремысе 58-ше №-ан шуко пачашан пӧрт леведышым тӱрыс вашталтыме. Тыгаяк паша кызыт Подольский курсант-влак уремысе, 16-шо №-ан оралте ӱмбалне кая. Вич тылзе жапыште Ленин проспектысе 45-ше №-ан пӧртым тӱрыс олмыктымо. Кодшо кечылаште ола администраций гыч комиссий подрядчик дене пырля лишыл жапыште сдатлышаш пӧртым терген лектыныт. Кажне олмыктымо пӧртым комиссий подвал гыч тӱҥалын тувраш марте онча. Тӱҥ шотышто подрядчикын пашажым сай велым акленыт. Олмыктымо паша кайыме жапыште пачер оза-влаклан йӧндымылыкым лукшо икмыняр ситыдымашым тӧрлатеныт. Тиде пӧртым капитально олмыктышо «Сподрядстрой» ООО подрядчик, генеральный директор Е.Сумароков мом ыштыме нерген каласкален. Ола мучко але марте ышталше да ончыкыжым олмыктышаш паша дене Л.Покровский палдарыш:

Ӱмаште шуко пачеран 62  пӧртым олмыкташ 330 миллион теҥгем кучылтмо. Тений идалык мучаш марте эше 45 пӧртым олмыкташ палемдыме. Тидлан 313 миллион теҥге наре окса кайышаш. Тачысе кечын 2020-2022 ийлаште олмыктышаш планым ямдылена. Южо пӧртыштӧ кӱчык жапыште пеш писын иктаж-могай посна пашам шуктымылан кӧра планыш вашталтыш пурталтынак шога. Ты программыш логалаш манын, виктарыше компаний, пачер оза-влакат чолгарак лийшаш улыт.

– Ола покшелне шогышо ты пӧртым сдатлаш йӧрышым ыштен шуктымо. Тудо тӱжвал сынже дене шинчалан перныше. Проспектысе корныш асфальтым шарен шуктымо. Ты объект йырысе кумдыкым авырен налме шотышто шылталымашан шомак лектыныт ыле, но нуным подрядчик жапыштыже кораҥден. Вет олмыктымо жапыште пачер оза-шамыч йӧндымылыкым шижшаш огытыл. Йӱран игечыште кудывечыште газоным тошкаш огыл манын, оҥам пышташ йодмо ыле. Теве олмыктымо деч вара пӧрт моткоч сӧрал коеш. 

Вич тылзыште тыгай кугу йӧндымылыкшӧ шижалтын огыл, – куанымыжым ойлыде ыш чыте 30 ий утла тиде пӧртыштӧ илыше Галина Карпова. – Пӧртым капитально олмыктымо деч ончыч пытартыш пачашыште илыше-шамычше поснак чот йӧсыланенна. Ик гана веле огыл, поснак шошым, тувраш гыч вӱд йогымылан кӧра пачерым олмыкташ тоштын огынал. Мемнан пӧрт 50-ше ийлаштак чоҥалтше. Ойлыманат огыл, подряд организаций пӧртнам пеш чаплым ыштен. Туврашым леведыныт, оралтын тӱжвал велжым чиялтеныт. Кажне пачерыште газ пучым алмаштеныт. Подвалыште, подъездыште окнам пластиклан алмаштеныт. Подъезд туврашым леведыныт.   

– Олмыктымо годым паша графикым пачер оза-влак дене вашла кутырен келыштарыме. Нунлан йӧндымылыкым лукде, уто гана шинчаш перныдымын пашам ышташ тӧчымӧ. Тыште  сеть системым шотыш кодымо, газ пучым уэмдыме, зданийым чиялтыме. Туврашым тӱрыс леведашак 40 кубометр чодыра каен, – мутым умбакыже шуйыш «Сподрядстрой» ООО подрядчикын генеральный директор Е.Сумароков.

Димитров уремысе пӧртым олмыктымо нерген «Заводской» ЖЭУК ОАО-н директоржо Александр Демаковын каласкалымыж гычат умылен нална:

– Тиде пӧртым ик ий ончыч капитально олмыктымо. Виктарыше компаний вара шке куатше дене подъезд-шамычым шотыш кондыш. Ончылий «Ола кумдыкым тачысе илышлан келшышын тӱзатымаш» федерал программе полшымо дене кудывече кумдыкыш асфальтым шарышт, йоча площадкым вераҥдышт. Ынде вес ийын ты программе дене 4 подъездысе лифтым вашталташ шонена. Кодшыштым – кок ий гыч, вет тыгай паша иканаште ок ышталт. 1 лифтланак 2 миллион теҥге кӱлеш. Чылажге ме 215 пӧртым обслуживатлена. Программын пашам ыштыме вич ий жапыште 34 пӧртым олмыктен кертынна. Тений идалык мучаш марте эше 9 пӧртым олмыктен шуктышаш улына.

Р.Чепакова.

Снимкыште: Ленин проспектыште сдатлаш ямдылен шуктымо пӧрт;

Сподрядстрой» ООО подрядчикын, генеральный директоржо Е.Сумароков (покшелне) ыштыме паша дене палдара.

 

Фотом администраций сайт гыч налме.

Опубликовать в Одноклассники

Добавить комментарий