11 сентябрьыште Руш православный черке Господьым тынеш пуртышо Иоаннын вуйжым руал шумо пайремым палемда да тиде кечын пеҥгыде пӱтым кучаш кӱшта.
Библийыште возымо почеш, шочмо кечыж лӱмеш эртарыме пирыште Ирод кугыжа руштыктарыше напиткым йӱмыж деч вара калыкын пагалыме пророкшо Иоанн Крестительын вуйжым руал шуаш кӱштен. Сулыкым ышташ таратыше аракам тынар огеш йӱ гын, Ирод кугыжа кӱштымашыжым шӧраш вийым муэш ыле, очыни…
Чаманен палемдыман, чыла тиде кызытат ышталтеш… Калык тачат кок тӱжем ий ончычсо семынак йӱшывуя тудым ышта, можым орвуя шоналташат лӱдеш. Тыгай койыш илышым уда могырыш савырымыж деч посна эше лишыл ден йырым-йыр улшо еҥ-влакын кумылыштым волта.
Шкем эскерыдыме да кучен кертдыме койышын шучко пашам ышташ таратымыжым ушештарен, Руш православный черкын Священный синодшо Господьым тынеш пуртышо Иоаннын вуйжым руал шумо пайрем годым ий еда Айык улмо кечым палемдаш пунчалын. Тидлан кӧра пайрем 2005 ийыште кызытсе Российыш пӧртылын.
У коронавирус инфекцийын шарлен кертмыжлан кӧра тений республикыштына айык йӱлам чапландарыме мероприятий-влак огыт эртаралт, но 11 сентябрьыште Йошкар-Ола епархийын черкылаштыже литургий деч вара арака да наркотик деч орланыше-шамыч нерген мурен кумалыт. Тыгай радамыш логалше родо ден йолташ-влакын лӱмыштым рӱдоласе черке лапкылаште возыкташ лиеш.
Марий Элыште иерей Андрей Кочаковын вуйлатымыж почеш 2005 ий гыч Шочынаван «Йӱын пытарыдыме Чукыр» («Неупиваемая Чаша») юмоҥаж лӱмеш Айыклык православный обществе пашам ышта. Тушто черле родо ден лишыл еҥ-влакын пареммышт нерген молебеным служитлат.
Тидын дене кылдалтше уверым ВКонтакте социальный кылыште http://vk.com/club29048636 адрес дене муаш лиеш.
Йошкар-Ола епархийын уверже негызеш М.ИВАНОВА ямдылен
