ТАЗАЛЫК

Кумшо йыжыҥ ончылно

Республикысе 7 стационарыште у коронавирус инфекций дене черланыше-влакым эмлаш 620 койко уло.
11 августышто Марий Элым вуйлатыше Александр Евстифеев РФ У коронавирус инфекций шарлыме ваштареш шогымо шотышто кугыжаныш советын пашаче группыжын видеоконференцкыл йӧн дене эртыше черетан заседанийыштыже участвоватлен.
Тушто шыжымсе эпидсезон, шинчымашым пуымо тӧнеж-шамычын у тунемме ийлан ямдылалтмышт да нунын коронавирусын пандемийже пагытыште пашам ыштыме ойыртемышт, грипп дечын вакцинацийым эртарыме нерген мутланеныт.
Таче кечылан Марий Элыште шинчымашым пуымо 541 тӧнеж гыч 454 организацийжым приниматлыме. Школ деч ончычсо шинчымашым пуымо чыла 224 тӧнеж, тыгак ешартыш шинчымашым пуымо чыла 46 организаций, 247 гыч 175 общеобразовательный тӧнеж пашам тӱҥалаш ямде улыт.
COVID-19 шарлен кертме лӱдыкшӧ улмо пагытыште организацийлаште у коронавирус инфекций дене черланыме деч профилактикым эртарыме мероприятий планым пеҥгыдемдыме.
28 июльлан налмаште температурым айдемын капкылышкыже логалде висыме термометрым, еҥ улмо годымак южым эрыктыме 200 наре приборым да дезинфицироватлыме средствым шапашлыме.
1-4 класслаште тунемше-влаклан кечывалым яра кочкаш йӧным ыштыме.
2020-2021 ийласе эпидсезонышто грипп дечын 375 тӱжем утла еҥлан прививкым ышташ палемдыме.
10 августлан налмаште Марий Элыште у коронавирус инфекций дене черланыме 3917 случайым официально регистрироватлыме, пытартыш суткаште – латнылытым. 693 еҥ медицине велым эскералтеш.
Регион — чараклыме мероприятий-влакым кораҥдыме III йыжыҥыште. Республикыште коронавирус дене черланыме чот иземын толеш – пытартыш арняште суткаште кокла шот дене 14-15 случайым регистрироватлыме. Пытартыш кок арняште 100 тӱжем еҥлан шотлымаште кечыште 114 тестым ыштыме. 16 июль гыч койко фонд 50 утла процентлан ярсен.

Марий Элым вуйлатышын организаций да аналитике виктемжын уверже негызеш М.ИВАНОВА ямдылен

Опубликовать в Одноклассники

Добавить комментарий